මේ වසරේ ශ්‍රී ලංකා රජය විසින් රැස්කර ඇති ආදායම් ප්‍රමාණවත් නොවීම සම්බන්ධයෙන් අන්තර්ජාතික මූල්‍ය අරමුදල සැළකිලිමත් වන බව රොයිටර් පුවත් සේවය වාර්තා කර ඇත.

2023 මාර්තු මාසයේදී එකඟ වූ සිව් අවුරුදු ණය ගනුදෙනුවේ පළමු සමාලෝචනයේ කොටසක් ලෙස IMF හි නියෝජිත පිරිසක් මුදල් ඇමැති සහ ජනාධිපති රනිල් වික්‍රමසිංහ සහ ශ්‍රී ලංකා මහ බැංකු අධිපතිවරයා අද හමුවූහ.

රොයිටර් වාර්තාවට අනුව පළමු සමාලෝචනය සපුරාලීමට අවශ්‍ය බොහෝ නිර්දේශයන් ශ්‍රී ලංකාව සපුරා ඇත.

දේශීය ණය ප්‍රතිව්‍යුහගතකරණය කිරීමේ ප්‍රගතිය මෙයට ඇතුළත් වේ.

එහෙත් මේ වසර සඳහා ශ්‍රී ලංකාවේ ආදායම් හිඟය පිළිබඳ කනස්සල්ලක් පවතින බවත්, ඔවුන් වොෂින්ටනය සමඟ වැඩිදුර සාකච්ඡා පවත්වමින් ඉදිරියට යන්නේ කෙසේදැයි බැලීමට ඉඩ ඇති බවත් වාර්තාව සඳහන් කරයි.

මුදල් රාජ්‍ය ඇමැති රංජිත් සියඹලාපිටිය පසුගිය සතියේ ජනමාධ්‍යය වෙත පැවසුවේ, මෙම ආදායම් හිඟය රුපියල් බිලියන 100ක් (ඩොලර් මිලියන 312ක් පමණ) විය හැකි බවයි.

රජයේ ඉලක්කය වූයේ පසුගිය වසරේ ආදායම 8.3% සිට 2023 දී දළ දේශීය නිෂ්පාදිතයෙන් 11.3% දක්වා ඉහළ නැංවීමයි.

IMF සමාලෝචනයට පෙර ණය ප්‍රතිව්‍යුහගතකරණය කිරීමේ අවශ්‍යතා සපුරාලීම සඳහා පියවරක් ලෙස, ඩොලර් බිලියන 10ක් පමණ වටිනා පැහැර හරින ලද දේශීය ණය නව බැඳුම්කර සඳහා හුවමාරු කර ගැනීමට ශ්‍රී ලංකාව ඉදිරිපත් විය.

ශ්‍රී ලංකාව පසුගිය වසරේ මැයි මාසයේදී ණය ආපසු ගෙවීම් අත්හිටුවීමෙන් පසු, සිය විදේශ ණය නැවත සකස් කිරීම සඳහා ගිවිසුමකට එළඹීම වෙනුවෙන් ජපානය, චීනය සහ ඉන්දියාව ඇතුළු බැඳුම්කර හිමියන් හා ද්විපාර්ශ්වික ණය හිමියන් සමඟ සාකච්ඡා වට කිහිපයක් පවත්වා තිබේ.