වීසා රහිත සංචාරක ප්‍රවේශය මත පදනම්ව ගෝලීය විදේශ ගමන් බලපත්‍රයේ වටිනාකම තක්සේරු කරන නවතම Henley විදේශ ගමන් බලපත්‍ර දර්ශකයේ ශ්‍රී ලංකාව 91 වැනි ස්ථානයට පත්ව තිබේ.

2024 වර්ෂයේදී මෙරට විදේශ ගමන් බලපත්‍රය එම දර්ශකයේ 96 වැනි ස්ථානයේ තිබුණු අතර මෙවර ස්ථාන පහක් ඉදිරියට පැමිණ තිබීම විශේෂත්වයකි.

Henley & Partners විසින් නිකුත් කරන ලද 2025 ශ්‍රේණිගත කිරීම්වලට අනුව, ශ්‍රී ලංකා විදේශ ගමන් බලපත්‍ර හිමියන්ට වීසා නොමැතිව රටවල් 42කට ගමන් කළ හැකිය.

සමස්ත ශ්‍රේණිගත කිරීම් 99කින් සමන්විත ලැයිස්තුවේ ඉරානය සහ සූඩානය සමඟ ශ්‍රී ලංකාව 91 වැනි ස්ථානයේ සමව රැඳීසිටියි.

සිංගප්පූරුව ලොව බලවත්ම විදේශ ගමන් බලපත්‍රය ඇති රට බවට පත්කරමින් දර්ශකයේ ප්‍රමුඛ ස්ථානය හිමිකර ගෙන තිබේ.

සිංගප්පූරු විදේශ ගමන් බලපත්‍ර හිමියන්ට ගමනාන්ත 193කට වීසා රහිත ප්‍රවේශය හිමිවේ.

ජපානය සහ දකුණු කොරියාව ඒකාබද්ධව දෙවැනි ස්ථානය හිමිකර ගෙන සිටින අතර ඩෙන්මාර්කය, ෆින්ලන්තය, ප්‍රංශය, ජර්මනිය, අයර්ලන්තය, ඉතාලිය සහ ස්පාඤ්ඤය තුන්වැනි ස්ථානයේ පවතී.

ලැයිස්තුවේ අග සිට සළකා බැලීමේදී ඇෆ්ගනිස්ථානය අවසන් ස්ථානයට පත්ව ඇති අතර, එහි විදේශ ගමන් බලපත්‍ර හිමියන්ට අවම ගෝලීය සංචාර පිළිගැනීම හිමිව ඇත.

ගෝලීය පුරවැසිභාවය සහ පදිංචිය පිළිබඳ උපදේශක සමාගමක් වන Henley & Partners විසින් සම්පාදනය කරන ලද Henley විදේශ ගමන් බලපත්‍ර දර්ශකය, ඔවුන්ගේ හිමිකරුවන්ට පූර්ව වීසා බලපත්‍රයක් අවශ්‍ය නොවී පැමිණිය හැකි ගමනාන්ත ගණන අනුව ගමන් බලපත්‍ර ශ්‍රේණිගත කරයි.