සෞඛ්‍ය ගැටලු තිබූ ශ්‍රී ලාංකික කාන්තාවක් හේතුවෙන් බදාදා ඉරාකයේ අර්බිල් අන්තර්ජාතික ගුවන්තොටුපළට ගුවන් යානයක් හදිසි ගොඩබා ඇත.

එරට ශ්‍රී ලංකාවේ කොන්සල්වරයාට අනුව ඇය පැය කිහිපයකට පසු කුර්දි අගනුවරදී මියගොස් තිබේ.

අර්බිල් හි ශ්‍රී ලංකාවේ කොන්සල් අහමඩ් ජලාල් බ්‍රහස්පතින්දා ප්‍රකාශ කර ඇත්තේ, දෝහා සිට පැරිස් බලා යන ගුවන් යානයක රෝගී වූ ශ්‍රී ලාංකික කාන්තාවක් සිටින බව කුර්දිස්තාන් කලාපයේ අදාළ බලධාරීන් විසින් දැනුම්දී ඇති බවයි.

ඇය 81 හැවිරිදි වියේ පසුවූ අතර ප්‍රංශයේ ජීවත්වී තිබේ.

ශ්‍රී ලංකා කොන්සල් කාර්යාලය ප්‍රංශ පුරවැසියෙකු වන ඇගේ පුතා වෙත මෙම සිදුවීම දැනුම්දී ඇති අතර, ජලාල්ට අනුව ඔහුගේ මවගේ මළ සිරුර පැරීසියට ප්‍රවාහනය කිරීමට උදව් කරන ලෙස කුර්දි බලධාරීන්ගෙන් ඉල්ලා තිබේ.

“මෙවැනි සිද්ධියක් සිදු වූ පළමු අවස්ථාව මෙයයි,” ඔහු සඳහන් කර ඇත.

වාර්තාවන්ට අනුව මෙම යානය කටාර් එයාර්වේස් සමාගමට අයත් වේ.

සිද්ධිය සම්බන්ධයෙන් ගුවන් සමාගම තවමත් අදහස් දක්වා නොමැත.