May 7, 2024
ශ්‍රී ලංකාවට පැමිණෙන විදේශිකයන් සඳහා දින 30ක වීසා බලපත්‍රයක් සඳහා දැනට පවතින ඇමෙරිකානු ඩොලර් 50ක ගාස්තුව තවදුරටත් පවත්වාගෙන යාමට අද (06දා) පැවැති කැබිනට් රැස්වීමේදී තීරණය කළ බව ජනාධිපති මාධ්‍ය අංශය නිවේදනය කරයි.
තවද, ඉන්දියාව, චීනය, රුසියාව, ජපානය, මැලේසියාව, තායිලන්තය සහ ඉන්දුනීසියාව යන රටවල් හතක පුරවැසියන් සඳහා දැනට ලබා දී ඇති නොමිලේ වීසා සේවාව අඛණ්ඩව ක්‍රියාත්මක වන බව තහවුරු කර ඇත.
මෙරටට විදේශිකයකු ඇතුල්වීමේදී අදාළ වීසා නිකුත්කිරීමේ පූර්ණ වගකීම ආගමන විගමන දෙපාර්තමේන්තුව සතු බව ද රජය අවධාරණය කර තිබේ.
රටේ සංචාරක ක්ෂේත්‍රයේ කැපී පෙනෙන ප්‍රගතියක් මධ්‍යයේ, විදේශිකයන් සඳහා උපරිම වීසා ගාස්තුව ඇමෙරිකානු ඩොලර් 50ක් ලෙස පවත්වාගෙන යන ලෙස කර්මාන්තයේ නියැලෙන බොහෝ පාර්ශ්වකරුවන් පසුගියදා ජනාධිපති රනිල් වික්‍රමසිංහගෙන් ඉල්ලා සිටි බව එම නිවේදනයේ දැක්වේ.
මෙම තීරණය සංචාරක ව්‍යාපාරයේ අනාගත ප්‍රගමනයට සුවිශේෂී රුකුලක් වන බවද අවධාරණය කර ඇත.
එහි ප්‍රතිඵලයක් ලෙස ඊයේ පැවැති ඇමැති මණ්ඩල රැස්වීමේදී ඒ පිළිබඳව කරුණු ඉදිරිපත් කිරීමෙන් අනතුරුව ජනාධිපති රනිල් වික්‍රමසිංහ මෙම තීරණයට එළඹි බව ජනාධිපති මාධ්‍ය අංශය වැඩිදුරටත් ප්‍රකාශ කරයි.
ජනාධිපති රනිල් වික්‍රමසිංහගේ ප්‍රධානත්වයෙන් ඊයේ පැවැති කැබිනට් මණ්ඩල රැස්වීමේදී සංචාරක ඇමැති හරීන් ප්‍රනාන්දු සිය අමාත්‍යාංශයෙන් ඉල්ලා අස්වන බවට තර්ජනය කර ඇති බව වාර්තා විය.
නව වීසා ක්‍රියාවලිය සම්බන්ධයෙන් සිය අප්‍රසාදය පළකර ඇති ඇමැති ප්‍රනාන්දු, නව වීසා ක්‍රමය කිසිදු වෙනසක් නොමැතිව අඛණ්ඩව ක්‍රියාත්මක වුවහොත් තමා සිය ඇමැති ධුරයෙන් ඉල්ලා අස්වන බව කැබිනට් මණ්ඩලයට දැනුම් දී ඇතැයි පැවැසිණි.
