වඳුරු උණ ලෙස සාමාන්‍ය ව්‍යවහාරයේ හැඳින්වෙන mpox වෛරසය ආසාදනය වී ඇති බවට සැකකෙරෙන රෝගියකු ඉන්දියාවෙන් වාර්තා වීමත් සමඟ මෙරට සෞඛ්‍ය බලධාරීන් සිය සුපරීක්ෂාකාරීත්වය තවදුරටත් ඉහළ නංවා තිබේ.

ඉන්දියාවේ සෞඛ්‍ය අමාත්‍යාංශයට අනුව, mpox වෛරසය පැතිර ඇති රටක මෑතකදී සංචාරය කළ පුද්ගලයකු එම රෝග ලක්ෂණ පෙන්වා තිබේ.

තරුණ පිරිමි පුගලයකු වන එම රෝගියා රෝහලක හුදකලා කර ඇති අතර ස්ථාවර තත්ත්වයේ සිටින බව ඉන්දීය සෞඛ්‍ය අමාත්‍යාංශය නිවේදනය කර තිබේ.

mpox වෛරසයේ කුමන ප්‍රභේදය රෝගියාට ඇත්දැයි අමාත්‍යාංශය සඳහන් කර නැත.

ආසාදනය තහවුරු කිරීම සඳහා පරීක්ෂණ පවත්වන බව පමණක් දැනට ඔවුන් ප්‍රකාශ කර ඇත.

clade 1b ප්‍රභේදයේ mpox ගෝලීය අවධානයට හේතු වී ඇත්තේ එය සාමාන්‍ය සමීප සම්බන්ධතා හරහා වඩාත් පහසුවෙන් පැතිරෙන බව පෙනී යෑම හේතුවෙනි.

මෙම බෝවන රෝගය සම්බන්ධයෙන් ලෝක සෞඛ්‍ය සංවිධානය මෑතකදී අන්තර්ජාතික අවධානයට ලක්විය යුතු මහජන සෞඛ්‍ය හදිසි අවස්ථාවක් ලෙස ප්‍රකාශයට පත් කළේය.

මෙරට සෞඛ්‍ය අමාත්‍යාංශයේ මූලාශ්‍රවලට අනුව රෝගීන්ගේ විශාල වැඩිවීමක් සිදුවී නොමැති වීම සහ හදිසි පියවර දැනටමත් ක්‍රියාත්මක වන බැවින් mpox සම්බන්ධ ආසන්න තර්ජනය ශ්‍රී ලංකාවට පවතින්නේ තවමත් අවම මට්ටමකය.

කෙසේවෙතත් සෞඛ්‍ය අමාත්‍යාංශ ආරංචි මාර්ගවලට අනුව අතිරේක සෝදිසි කටයුතු සඳහා පියවර ගෙන තිබේ.

මේ වන විට වාර්තා වී ඇති බොහෝ සිද්ධීන්වලට සැළකිව යුතු ලෙස ඉහළ රෝගීන් සංඛ්‍යාවක් සිටින රටවල සංචාර සිදුකළ ඉතිහාසයක් ඇති පුද්ගලයන් සම්බන්ධ වන බැවින්, ගනු ලබන පියවර අතරට ගුවන් තොටුපළවල සහ වරායන්හි ඉහළ නිරීක්ෂණ ඇතුළත් වේ.

ලෝක සෞඛ්‍ය සංවිධානයට අනුව, Monkeypox යනු සාමාන්‍යයෙන් සති දෙකේ සිට හතර දක්වා පවතින රෝග ලක්ෂණ සහිත රෝගයකි.

එය සාමාන්‍යයෙන් උණ, කුෂ්ට සහ ඉදිමුණු වසා ගැටිති ආදී ලක්ෂණ පෙන්නුම් කරන අතර වෛද්‍ය සංකූලතා රාශියකට තුඩු දිය හැකිය.

එය ශරීර තරල හෝ තුවාල සමඟ සෘජු ස්පර්ශයකින් ද, ආසාදිත පුද්ගලයකුගේ දූෂිත ඇඳුම් වැනි ද්‍රව්‍ය සමඟ වක්‍රව සම්බන්ධ වීමෙන් ද සම්ප්‍රේෂණය කළ හැකිය.