November 20, 2023
ආණ්ඩුක්‍රම ව්‍යවස්ථා සභාවේ අනුමැතියකින් තොරව පොලිස්පති චන්දන ඩී. වික්‍රමරත්නට සේවා දිගු ලබාදීමට එරෙහිව නීතිමය ක්‍රියාමාර්ග ගැනීම පිළිබඳව සලකා බැලිය හැකි බව ශ්‍රී ලංකා නීතීඥ සංගමය ඊයේ (19) ප්‍රකාශ කර ඇත.
ජනාධිපති සහ ආරක්ෂක ඇමැති රනිල් වික්‍රමසිංහ පොලිස්පතිවරයාට ලබා දුන් නවතම සේවා දිගුව ආණ්ඩුක්‍රම ව්‍යවස්ථා සභාව විසින් අනුමත නොකළ බැවින් තාක්ෂණික වශයෙන් මේ වන විට රට තුළ පොලිස්පතිවරයෙකු නොමැති බව නීතීඥ සංගමය සඳහන් කරයි.
පොලිස්පතිවරයා ලෙස වික්‍රමරත්නට ලබාදී ඇති තෙවැනි සේවා දිගුවට එම සභාවේ අනුමැතිය හිමි නොවූ අතර, බහුතර සභා සාමාජිකයන්ද ඔහුට ලබාදී ඇති සිව්වැනි සේවා දිගුව අනුමත කිරීම ප්‍රතික්ෂේප කරමින් සිටින බව පසුගියදා වාර්තා විය.
ජනාධිපතිවරයා විසින් පොලිස්පතිවරයා පත් කළ යුත්තේ ආණ්ඩුක්‍රම ව්‍යවස්ථා සභාවේ අනුමැතිය මත බව ශ්‍රී ලංකා නීතීඥ සංගමයේ සභාපති නීතිඥ කෞෂල්‍ය නවරත්න පවසයි.
පොලිස්පතිවරයා ප්‍රායෝගිකව තම රාජකාරිය ඉටු කරන්නේ දැයි තමන් නොදන්නා නමුත් ඔහුට ලබා දී ඇති සේවා දිගුව නීතියෙන් වලංගු නොවන බවට යමෙකුට තර්ක කළ හැකි බව ඔහු පවසා ඇත.
එම නිසා ආණ්ඩුක්‍රම ව්‍යවස්ථා සභාවේ අනුමැතිය නොසලකා වික්‍රමරත්නට සේවා දිගු ලබාදීම නීතිය ඉදිරියේ අභියෝගයට ලක්විය හැකි බවද ඔහු පවසයි.
පොලිස්පතිවරයා පත් කළ යුතු ආකාරය නීතියේ දක්වා ඇති අතර, එය පිළිපැදීමට හෝ අනුගමනය කර නොමැති නම්, එය නිසැකවම අභියෝගයට ලක්විය හැකි බව හෙතෙම සඳහන් කරයි.
රටේ පොලිස්පතිවරයෙක් නැත්නම් රට අරාජිකත්වයට යන බවත්, එබැවින්, නීතීඥ සංගමය ලෙස ඔවුන් මෙම කාරණය බැරෑරුම් ලෙස සලකා බලා සුදුසු ක්‍රියාමාර්ග ගන්නා බවත්, සභාපතිවරයා වැඩිදුරටත් පවසයි.(Morning)
