ප්‍රතිශක්තිය මගහරින සහ වේගයෙන් ව්‍යාප්ත වන කොවිඩ් ප්‍රභේදයක් ඉන්දියාවේ කේරළයෙන් හඳුනාගැනීමත් සමඟ මෙරට සෞඛ්‍ය බලධාරීන් ඒ පිළිබඳ විශේෂ අවධානයක් යොමුකර තිබේ.

කේරළයේ කාන්තාවකගෙන් නව JN.1 කොවිඩ් උප ප්‍රභේදයක් හඳුනාගැනීමත් සමග ඉන්දියාව ඒ පිළිබඳ අවධානය මතු කරමින් සහ අවදියෙන් සිටීමේ අවශ්‍යතාව අවධාරණය කළේය.

එරට මධ්‍යම සෞඛ්‍ය අමාත්‍යංශය දෙසැම්බර් 16 වැනි දින කේරළයේ රෝගියා හඳුනාගැනීමෙන් පසු ඒ සඳහා සූදානම්වීමේ පියවර ආරම්භ කළේය.

මහජන සෞඛ්‍යය සහ රෝහල් සූදානම ඇගැයීම සඳහා ප්‍රාන්තය පුරා සෞඛ්‍ය පහසුකම් පිළිබඳ අභ්‍යාසයක් ද ක්‍රියාත්මක වේ.

කොවිඩ් රෝගය පිළිබඳ මෙරට සම්බන්ධීකාරක වෛද්‍ය අන්වර් හම්දානි පවසන්නේ, විදේශ රටක පැතිර යන ඕනෑම නව රෝගයක් ශ්‍රී ලංකාවට තර්ජනයක් විය හැකි බැවින් සෞඛ්‍ය අමාත්‍යංශය සැමවිටම සීරුවෙන් සිටින බවයි.

“කේරළයේ පැතිරෙන නව උප ප්‍රභේදය සම්බන්ධයෙන් ගත් කල, අපි සුපරීක්ෂාකාරීව සහ තත්ත්වය නිරීක්ෂණය කරමින් සිටිනවා” යනුවෙන් ආචාර්ය හම්දානි පැවසීය.

උණ, නාසයෙන් සොටු දියර ගැලීම, උගුරේ අමාරුව වැනි රෝග ලක්ෂණ පැය 48ක් පුරා පැවතියහොත් ආසාදනය පැතිරීමේ අවදානම අවමකිරීම සඳහා මුහුණු ආවරණ පළඳින ලෙසත් ඉක්මනින් පරීක්ෂණවලට භාජනය වන ලෙසත් ඔහු ජනතාවට උපදෙස් දුන්නේය.

කොවිඩ් 19 JN.1 ප්‍රභේදය ඔමික්‍රෝන් (Omicron) BA.2.86 උප ප්‍රභේදය හෝ Pirola ලෙස සැළකේ.

එය ප්‍රථම වරට 2023 සැප්තැම්බර් මාසයේදී එක්සත් ජනපදයෙන් අනාවරණ විය.

රොයිටර්ස් වාර්තාවකට අනුව, දෙසැම්බර් 15 වැනි දින, චීනය විශේෂිත උප ප්‍රභේදයේ ආසාදන හතක් අනාවරණ කළේය.

විශේෂඥයන් පවසන පරිදි, JN.1 ප්‍රභේදය වේගයෙන් පැතිරීමට සහ ප්‍රතිශක්තිකරණය මගහැරීමට සමත් වේ.

JN.1 යනු මෙම වෛරසයේ අනෙකුත් සියලුම පූර්ව උප ප්‍රභේදවලට වඩා සැළකිව යුතු ලෙස වෙනස් වන, දැඩි ලෙස ප්‍රතිශක්තිය මගහරින සහ වේගයෙන් පැතිරෙන ප්‍රභේදයක් බව විශේෂඥයන් පෙන්වා දී තිබේ.

තවද, වාර්තා වී ඇති රෝග ලක්ෂණ අතර උණ, නාසයෙන් දියර ගැලීම, උගුරේ අමාරුව, හිසරදය සහ සමහර අවස්ථාවල මෘදු ආමාශ අන්ත්‍ර ආශ්‍රිත රෝග ලක්ෂණ ඇතුළත් වේ.