විශේෂඥ වෛද්‍යවරුන් විශ්‍රාම යෑමේ වයස අවුරුදු 63 දක්වා ඉහළ දැමීමට සෞඛ්‍ය බලධාරීන් තීරණය කර ඇති බව නීතිපතිවරයා විසින් අද(27) අභියාචනාධිකරණයට දැනුම් දී ඇත.

පෙත්සම්කරුවන්ගේ විශ්‍රාම යෑමේ වයස අවුරුදු 63 දක්වා වැඩි කරන බවට සෞඛ්‍ය අමාත්‍යාංශයේ ලේකම්වරයාගෙන් උපදෙස් ලැබී ඇති බවත්, ඒ සඳහා කැබිනට් තීරණයක් ගන්නා බවත්, නීතිපතිවරයා වෙනුවෙන් පෙනී සිටි අතිරේක සොලිසිටර් ජනරාල් ජනාධිපති නීතිඥ නෙරින් පුල්ලේ අධිකරණයට දන්වා තිබේ.

2022.10.17 දිනැති ඇමැති මණ්ඩලයේ තීරණය අභියෝගයට ලක් කරමින් විශේෂඥ වෛද්‍යවරුන් 176 දෙනෙක් විසින් ගොනු කරන ලද රිට් පෙත්සමක ප්‍රතිඵලයක් ලෙස නීතිපතිවරයා මෙම දැනුම්දීම සිදුකර ඇත.

පෙත්සම්කරුවන් වෙනුවෙන් පෙනී සිටි ජනාධිපති නීතීඥ සංජීව ජයවර්ධන මෙම තීරණය අගය කළ අතර, එය පිළිගන්නා බවද සඳහන් කර ඇත.

කෙසේ වෙතත්, පෙත්සම්කරුවන් ජුනි 30 වැනිදා වන විට විශ්‍රාම යෑමේ අවදානමක් ඇති බැවින්, එදින දක්වා නඩුව ගෙන යෑමට ඔහු දැඩි ලෙස විරුද්ධ වී තිබේ.

නව යෝජනාව ක්‍රියාත්මක වන තුරු අද දින කරුණු ඉදිරිපත් කිරීමට අවසර දෙන ලෙසත්, එසේත් නැතිනම් අදාළ කරුණු සමථයකට පත් කරන්නේ නම් නීතිපතිවරයාට හෙට දිනයේ දී කරුණු දැක්වීම සඳහා නඩුව ස්ථිර කරන ලෙසත්, නීතීඥ සංජීව ජයවර්ධන යෝජනා කර තිබේ.

හෙට දිනයේ දී මෙම කරුණු දැක්වීමට නියම කරන ලෙස තවත් පෙත්සම්කරුවන් කිහිප දෙනෙක් වෙනුවෙන් පෙනී සිටි ජනාධිපති නීතිඥ රොමේෂ් ද සිල්වා ඉල්ලා ඇත.

ඒ අනුව අභියාචනාධිකරණය හෙට (28) මෙම නඩුවේ නැවත කැඳවීමට නියම කළ අතර, සටහන් කර ඇති ලේඛනයේ දක්වා ඇති සියලුම වෛද්‍ය වෘත්තිකයන්ට වසර 63 දක්වා සේවයේ රැඳී සිටීමට යෝජිත විසඳුම බව සටහන් කර තිබේ.