ජනාධිපති අනුර කුමාර දිසානායකගේ නායකත්වයෙන් යුත් ජාතික ජන බලවේගයේ විස්මිත මැතිවරණ ජයග්‍රහණය ශ්‍රී ලංකා දේශපාලනයේ ‘භූමිකම්පාවක්’ බව හිටපු නෝර්වීජියානු සාම නියෝජිත එරික් සෝල්හයිම් පවසයි.

දෙමළ ජනයා වෙසෙන ප්‍රදේශවල, විශේෂයෙන් උතුරේ, ජාතික ජන බලවේගය ප්‍රබල වී සිටීම ශ්‍රී ලංකාවේ වාර්ගික සබඳතාවල නව ආරම්භයක් සඳහා ඉතා ප්‍රබල කැඳවීමක් සනිටුහන් කළ බව හිටපු රාජ්‍ය තාන්ත්‍රිකයා සඳහන් කරයි.

කෙසේවෙතත්, බොහෝ ශ්‍රී ලංකාවේ නායකයන් සමඟ සමීපව කටයුතු කර ඇති සෝල්හයිම්, ජාතික ජන බලවේගයේ අභ්‍යන්තර හරය නිසැක වශයෙන්ම දූෂිත නොවන අතර, දූෂණය පිටුදැකීමට දැවැන්ත කාර්යයක් ඉටුකරනු ඇති බවට අනතුරු ඇඟවීය.

දැන් හරිත ක්‍රියාකාරිකයකු ලෙස කටයුතු කරන සෝල්හයිම්, 2002 මුල් භාගයේදී ශ්‍රී ලංකා රජය සහ දෙමළ ඊළාම් විමුක්ති කොටි හෙවත් එල්ටීටීඊ සංවිධානය අතර ඓතිහාසික ගිවිසුමකට තුඩු දුන් බටහිර පිටුබලය ලත් සාම ක්‍රියාවලියේ නියමුවා විය.

එහෙත් එම ක්‍රියාවලිය බිඳ වැටුණේ වසර හතරකට පසු නැවත යුද්ධයක් ඇති කරමින් 2009 දී එල්ටීටීඊය විනාශ කිරීමටත්, ආරම්භක නායක වේළුපිල්ලේ ප්‍රභාකරන් ඇතුළු එහි සමස්ත නායකත්වයම පාහේ සමූලඝාතනය කිරීමත් සමගය.

නෝර්වේහි සමාජවාදී වාම පක්ෂයේ හිටපු නායකයකු වන සෝල්හයිම් එල්ටීටීඊ හිතවාදී යැයි කියනු ලබන බහුතර සිංහල ප්‍රජාවේ ඇතැම් පිරිසගේ ප්‍රහාරයන්ට ලක් වූවත් ඔහු එම චෝදනාව නැවත නැවතත් ප්‍රතික්ෂේප කර තිබිණි.

‘The Federal from China’ සමඟ ඊමේල් සම්මුඛ සාකච්ඡාවකදී සෝල්හයිම් පවසා ඇත්තේ නොවැම්බර් 14 මැතිවරණයේදී ජාතික ජන බලවේගය ඉතා සාර්ථක වනු ඇතැයි තමා අපේක්ෂා කළ නමුත් ඔවුන්ගේ අතිවිශිෂ්ට ජයග්‍රහණය තමන් අපේක්ෂා කළ මට්ටමට වඩා වැඩි බවයි.

“එය ශ්‍රී ලංකා දේශපාලනයේ භූමිකම්පාවක්. ප්‍රථම වතාවට ශ්‍රී ලාංකිකයන් විසින් කොළඹින් පිටත අනුරාධපුරයේ කම්කරුවකුගේ පුත්‍රයකු වූ ජනාධිපතිවරයකු සහ පක්ෂයක් තෝරා පත් කර ගෙන තිබෙනවා. ඡන්දදායකයන්, විශේෂයෙන්ම අඩු වරප්‍රසාදලාභීන්, දූෂණය සම්බන්ධයෙන් කෝපයෙන් සිටින බවත්, සාම්ප්‍රදායික ප්‍රභූ පැලැන්තිය ඔවුන්ව හොඳින් නියෝජනය කර නැති බව ඔවුන්ට ගඟි ඇති බවත් පේනවා,” යැයි ඔහු පැවසීය.

තනි තනිව බොහෝ සාම්ප්‍රදායික ශ්‍රී ලාංකීය නායකයන් ඉතා යහපත් වුවත්, පංතියක් ලෙස ඔවුන් ශ්‍රී ලංකාව අසාර්ථක කර සිංගප්පූරුව, වියට්නාමය, මැලේසියාව හෝ තමිල්නාඩුවට සාපේක්ෂව රටම දුර්වල කර ඇති බව යනුවෙන් සෝල්හයිම් පැවසීය.

සිංහල ප්‍රදේශවල මුල් බැසගත් පක්ෂයක් වන ජාතික ජන බලවේගයට දෙමළ ප්‍රදේශවල අනපේක්ෂිත සහාය ලැබීමෙන් පෙනී යන්නේ එම වමේ පක්ෂය සම්බන්ධයෙන් බොහෝ දෙමළ ජනයා තුළ ‘විස්මිත’ විශ්වාසයක් ඇති බව යැයි සෝල්හයිම් පැවසීය.

වාමාංශික ජනතා විමුක්ති පෙරමුණේ මූලික ශක්තිය වන ජාතික ජන බලවේගය, ආසන 225කින් යුත් පාර්ලිමේන්තුවේ ආසන 159ක් දිනා ගනිමින් බෙදී ගිය විපක්ෂය විනාශ කළේය.

ඔවුන් දෙමළ බහුතරයක් සිටින උතුරේ සහ බහු වාර්ගික නැගෙනහිර පළාතේ ආසන ද ලබා ගත්තේය.

ජාතික ජන බලවේගයට දෙමළ ජනයා ඡන්දය දීම දෙමළ ජාතිකවාදී දේශපාලනය ප්‍රතික්ෂේප කිරීමක් දැයි මතු කෙරෙණු ප්‍රශ්නයකට සෝල්හයිම් පැවසුවේ “එය වාර්ගික සබඳතාවල නව ආරම්භයක් සඳහා ඉතා ප්‍රබල කැඳවීමක්. ජාතික ජන බලවේගය දෙමළ ජනයාට ඔවුන්ට අවශ්‍ය දේ ලබා දීමට සහ ඔවුන්ගේ සහාය තබා ගැනීමට හැකි නම්, එය ඓතිහාසික පෙරළියක් නියෝජනය කරයි.” යනුවෙනි.

එක්සත් ජාතීන්ගේ හිටපු උපලේකම්වරයකු ද වන ඔහු පැවසුවේ නව රජයේ ප්‍රමුඛතාව අන්තර්ජාතික මූල්‍ය අරමුදල (IMF) සමඟ වඩා හොඳ ගනුදෙනුවක් සඳහා සාකච්ඡා කිරීම සහ සාධාරණ ගනුදෙනුවක් සමඟ ආර්ථික වර්ධනය සඳහා ජයග්‍රාහී උපාය මාර්ගයක් සැකසීම බවයි.

ජාතික ජන බලවේගයේ ක්‍රියාකාරිත්වය සහ ඔවුන් සැප්තැම්බර් මාසයේදී ජනාධිපති ධුරය ද ජයග්‍රහණය කිරීම පෙන්නුම් කළේ වාමාංශික කල්ලිවාදය පසෙක තබා පුළුල් මහජන ආකර්ෂණයක් සහිත ප්‍රතිපත්තියක් ඉදිරිපත් කළහොත් වමට මැතිවරණ ජයග්‍රහණය කළ හැකි බව යැයි සෝල්හයිම් පවසා තිබේ.

“දිසානායක මෙය මූර්තිමත් කළේ ඔහුගේම ප්‍රවේශයකින්. පැරණි තාලයේ අදහස් ඇති වාමාංශික පක්ෂ මැතිවරණ ජයග්‍රහණය කරන්නේ නැහැ, ” යනුවෙන් ප්‍රකාශ කරමින් ඔහු බටහිර බෙංගාලයේ කලක් බලවත් වූ ඉන්දීය කොමියුනිස්ට් පක්ෂයේ (මාක්ස්වාදී) මැතිවරණ පරාජය පෙන්වා දුන්නේය.

“බ්‍රසීලයේ (ජනාධිපති) ලූලා (ද සිල්වා) මෙන් දිසානායක ව්‍යාපාරිකයන් සමඟ සමීපව කටයුතු කරන අතරම දුප්පතුන් සඳහා ප්‍රතිපත්ති හඳුන්වා දීමට හැකි නම්, ජාතික ජන බලවේගයට දිගු කලක් බලයේ සිටිය හැකියි. අප ශ්‍රී ලංකා දේශපාලනයේ නව යුගයක් අත්විඳ තිබෙනවාද නැතහොත් වසර පහක ආණ්ඩු වෙනසක් පමණක් අත්විඳ තිබෙනවා දැයි කීමට තවම කල් වැඩියි.” යනුවෙන් ඔහු ප්‍රකාශ කළේය.

ප්‍රභාකරන් ඇතුළු කොටි නායකයන් නිතර හමුවූ සෝල්හයිම්, 2002-2004 කාලයේ ශ්‍රී ලංකාව තුළ සාම ගිවිසුමක් ඇති කර ගැනීමට හැකිව තිබූ බවට වන තම මතය යළිත් අවධාරණය කළේය.

“අවාසනාවකට, අපි සාර්ථක වුණේ නැහැ… එහි ප්‍රතිඵලය වූයේ දස දහස් ගණනකගේ ජීවිත, ප්‍රධාන වශයෙන් දෙමළ ජාතිකයන් පමණක් නොව බොහෝ සිංහලයන් ද අහිමි වීමයි. ඇත්ත වශයෙන්ම යුද්ධය සියලු ජන කොටස්වලට විශාල ආර්ථික දුෂ්කරතා ඇති කළා. ශ්‍රී ලංකාව වරක් ආසියාවේ දිදුලන තාරකාව වුණා, අනෙකුත් සෑම රටකටම පාහේ ඔවුන්ව අනුකරණය කිරීමට අවශ්‍ය වුණා. දැන් ශ්‍රී ලංකාවට තමන්ගේ බොහෝ අසල්වැසියන් සමඟ සම්බන්ධ වීමට වසර ගණනාවක් පුරා තිරසාර හරිත ආර්ථික වර්ධනයක් අවශ්‍ය වනවා.” යනුවෙන් සඳහන් කළේය.

ශ්‍රී ලංකාව නිරීක්ෂණය කළ අයකු ලෙස ඔහුට ජනාධිපති දිසානායකට දීමට ඇති පණිවිඩය වන්නේ දුප්පතුන් නගා සිටුවීම සියලු ජනවර්ග සඳහා වැදගත් වන බව යැයි ඔහු සඳහන් කර තිබේ.

සමාන අයිතිවාසිකම් සහ ස්වයං පාලනයක් සඳහා දෙමළ සහ මුස්ලිම් ජනතාව කරන ඉල්ලීමට දිසානායක ජනාධිපතිවරයා හිතකර ප්‍රතිචාර දැක්විය යුතු බව ද ඔහු පැවසීය.