අන්තරායකර මත්ද්‍රව්‍යයක් හේතුවෙන් තහනම් උත්තේජක චෝදනා මත නිරෝෂන් දික්වැල්ලට මේ සතියේ සියලු ආකාරයේ ක්‍රිකට් තහනමක් පැනවීම තවත් එක් අපකීර්තිමත් සිද්ධියක් පමණක් නොවේ.

එය ශ්‍රී ලංකා ක්‍රිකට් ක්‍රීඩාව තුළ පවතින විනය සහ ස්ථාවරත්වය ඛාදනය පිළිබඳ පැහැදිලි මතක් කිරීමකි.

මෙම සිදුවීමෙන් අවධාරණය කෙරෙන්නේ ක්‍රීඩාවේ යටි පෙළටම තර්ජනයක් වන විනය විරෝධී ක්‍රියා මැඩලීම සඳහා දැඩි මාර්ගෝපදේශ සහ ක්‍රියාමාර්ග ගැනීමේ යාන්ත්‍රණයක හදිසි අවශ්‍යතාවයි.

ශ්‍රී ලංකා තහනම් උත්තේජක මර්දන නියෝජිතායතනය විසින් 2024 ශ්‍රී ලංකා ප්‍රිමියර් ලීග් තරඟාවලියේදී කරන ලද පරීක්ෂණවලින් අනතුරුව කඩුලු රකින ක්‍රීඩකයකු සහ පිතිකරුවකු වන දික්වැල්ල තහනම් මත්ද්‍රව්‍යයක් වන කොකේන් භාවිත කර ඇති බව හෙළිවීමෙන් පසු ශ්‍රී ලංකා ක්‍රිකට් ආයතනය විසින් ඔහුට ක්‍රීඩා තහනමක් පනවන ලදී.

මෙම හෙළිදරව්ව එම ක්‍රිකට් ක්‍රීඩකයාගේ වෘත්තීය ජීවිතයට මෙන්ම ශ්‍රී ලංකා ක්‍රිකට්වල වත්මන් තත්ත්වය පිළිබඳ බරපතළ කණස්සල්ලක් මතු කරයි.

2024 ලංකා ප්‍රිමියර් ලීග් (LPL) අතරතුර ශ්‍රී ලංකා තහනම් උත්තේජක මර්දන නියෝජිතායතනය විසින් පවත්වන ලද මෙම පරීක්ෂණය, ක්‍රීඩාවේ අඛණ්ඩතාව පවත්වා ගැනීම සඳහා ශ්‍රී ලංකා ක්‍රිකට් ආයතනයේ අඛණ්ඩ කැපවීමේ පියවරකි.

ක්‍රීඩා අමාත්‍යාංශයේ සහයෝගීතාවෙන් සහ ලෝක තහනම් උත්තේජක මර්දන නියෝජිතායතනයේ මාර්ගෝපදේශයන්ට අනුකූලව ක්‍රියාත්මක කරන ලද මෙම පරීක්ෂණවල අරමුණ වන්නේ ක්‍රිකට් ක්‍රීඩාව තහනම් ද්‍රව්‍යවල බලපෑමෙන් නිදහස්ව පවතින බව සහතික කිරීමයි.

මෙම තහනම දික්වැල්ලගේ වෘත්තීය ජීවිතයට බලපෑමක් විය හැකි අතර ඔහු වැරදිකරු වුවහොත් සියලු ආකාරයේ ක්‍රීඩාවලින් වසර හතරක දීර්ඝ තහනමකට මුහුණ දෙනු ඇත.

එපමණක් නොව, ශ්‍රී ලංකාව තුළ මත්ද්‍රව්‍ය භාවිතය සපුරා තහනම් බැවින් ඔහුට අපරාධ චෝදනා ද එල්ල විය හැකිය.

අගෝස්තු 23 වැනිදා ඔහුගේ විනය පරීක්ෂණය පැවැත්වීමට නියමිත අතර එහිදී ඔහුට එරෙහිව ගතයුතු ක්‍රියාමාර්ග තීරණය කරනු ඇත.

මෙම සිදුවීම හුදකලා සිදුවීමක් නොව මෑත වසරවල ශ්‍රී ලංකා ක්‍රිකට් ක්‍රීඩාවට බලපෑ කරදරකාරී සිදුවීම් මාලාවක තවත් එක් පියවරක් පමණි.

කලක් විනය සහ ක්‍රීඩාශීලිත්වය වෙනුවෙන් ගෞරවයට පාත්‍ර වූ ක්‍රිකට් ක්‍රීඩාව සදාචාරාත්මක හැසිරීම්වල පිරිහීමකට ලක්ව ඇති අතර, ක්‍රීඩකයන් කිහිප දෙනෙකු ඔවුන්ගේ කීර්ති නාමයට සහ රටේ ක්‍රිකට් ක්‍රීඩාවේ ප්‍රතිරූපයට කැළලක් වන මතභේදවලට පැටලී ඇත.

එවැනි සිදුවීම් සම්බන්ධයෙන් දික්වැල්ල ආගන්තුකයකු නොවේ.

ඔහු මීට පෙර වසර තුනකට පෙර ශ්‍රී ලංකා එංගලන්ත සංචාරයේදී කොවිඩ් 19 මාර්ගෝපදේශ උල්ලංඝනය කිරීම හේතුවෙන් ධනුෂ්ක ගුණතිලක සහ කුසල් මෙන්ඩිස් සමඟ තහනමට ලක්විය.

ක්‍රීඩකයන් තිදෙනාටම ක්‍රිකට් ක්‍රීඩාවේ සියලු ආකෘති වසරකට තහනම් කෙරිණි.

පසුව එය ක්‍රීඩකයන්ගේ අභියාචනා මත මාස හයකට අඩුකරන ලදී.

කෙසේවෙතත්, ඔහු දිගින් දිගටම මතභේදවලට සම්බන්ධ වී තිබේ.

කුමාර් සංගක්කාර වැනි පුරාවෘත්තයන් බිහිකළ කීර්තිමත් පාසලක අධ්‍යාපනය ලැබුවද දික්වැල්ල වෘත්තීය ක්‍රිකට් ක්‍රීඩකයකුගෙන් බලාපොරොත්තු වන ප්‍රමිතීන් ආරක්ෂා කිරීමට සමත් නොවූ තරම්ය.

එසේම ධනුෂ්ක ගුණතිලකට බරපතළ ලිංගික අපචාර චෝදනා එල්ල වූ අතර ප්‍රවීන් ජයවික්‍රම තරග පාවාදීමේ චෝදනාවලට හසුව සිටියේය.

වසරක නීතිමය සටනකින් පසු අවසානයේ ගුණතිලක නිදහස් කරනු ලැබුවද, ඔහුගේ සහ ක්‍රීඩාවේ කීර්ති නාමයට සිදුවූ හානිය ආපසු හැරවිය නොහැකි විය.

අන්තර්ජාතික ක්‍රිකට් කවුන්සිලයේ (ICC) දූෂණ විරෝධී ඒකකයේ විමර්ශනයක් තෙක් ජයවික්‍රමට ක්‍රිකට් තහනම් කර ඇති අතර එය ශ්‍රී ලංකා ක්‍රිකට් ක්‍රීඩාවේ විනය ගැටලු ලැයිස්තුවට තවත් එක් සිදුවීමක් එකතු කරයි.

ලංකා ප්‍රිමියර් ලීග් (LPL) තරගාවලිය ද මතභේදවලින් මිදී නැති අතර අවසන් තරගාවලියට දූෂණ චෝදනා එල්ල වී තිබිණි.

මෙම සිදුවීම් සාමූහිකව ක්‍රිකට් ක්‍රීඩාවේ මුල්බැසගත් ප්‍රශ්න සමඟ පොරබදමින් සිටින අඳුරු චිත්‍රයක් මවාපායි.