April 7, 2025
මියන්මාරය සඳහා වූ විශේෂ ශ්‍රී ලංකා වෛද්‍ය සහ මානුෂීය ආධාර ආපදා සහන කණ්ඩායම සෙනසුරාදා (අප්‍රේල් 05) යැන්ගොන් අන්තර්ජාතික ගුවන්තොටුපොළට පැමිණියේය.
ජනාධිපති අනුර කුමාර දිසානායකගේ උපදෙස් පරිදි සහ ආරක්ෂක ලේකම් එයාර් වයිස් මාර්ෂල් සම්පත් තුයියකොන්තගේ (විශ්‍රාමික) අධීක්ෂණය යටතේ විශේෂ ගුවන් යානයකින් වෛද්‍ය සැපයුම් සහ මානුෂීය ආධාර තොගයක් සමඟින් මෙම විශේෂ ත්‍රිවිධ හමුදා කණ්ඩායම පෙරේදා දිවයිනෙන් පිටත්ව ගියේය.
ශ්‍රී ලංකා තානාපති කාර්යාල ආරංචි මාර්ගවලට අනුව, මියන්මාරයේ ශ්‍රී ලංකා තානාපතිවරයා, මියන්මාර රාජ්‍ය ප්‍රභූවරුන් සමඟ ගුවන්තොටුපළේදී ශ්‍රී ලංකා කණ්ඩායම පිළිගෙන ඇත.
මෙම අත්‍යවශ්‍ය මොහොතේ හදිසි ආධාර ලබාදීමට ශ්‍රී ලංකාව ගත් පියවර යැංගුන් මහඇමතිවරයා බෙහෙවින් අගය කර ඇති අතර, ශ්‍රී ලංකාව විසින් සිදුකරන ලද මෙම වැදගත් කටයුත්ත දෙරට අතර දිගුකාලීන සමීප මිත්‍රත්වයේ බැඳීම අවධාරණය කරන බව පවසා තිබේ.
ශ්‍රී ලංකා කණ්ඩායම ආපදාවට ලක් වූ ප්‍රදේශවල මානුෂීය ආධාර සහ සහන කටයුතු සඳහා එරට පරිපාලන අගනුවර වන නේ පි ටෝ වෙත යොදවනු ඇත.
පසුගිය සතියේ මියන්මාරයට රිච්ටර් පරිමාණයෙන් 7.7 ක දරුණු භූමිකම්පාවක් බලපෑවේය.
