සැකකරුවකු විසින් කොටහේන ප්‍රදේශයේදී වාහනයක් සොරකම් කර පලා යෑමට උත්සාහ කළ සිද්ධියේ දී අදාළ සැකකරු එම සොරකම් කර ඇත්තේ එහි කාන්තාවන් දෙදෙනෙකු ද සිටියදී බව පොලිසිය පවසයි.

සිකුරාදා (12) වාර්තා වූ මෙම සිද්ධියේ දී සැකකරු රථය නොනවත්වා ධාවනය කිරීම හේතුවෙන් පොලිසිය වෙඩි තබා තිබිණි.

පොලිස් මාධ්‍ය අංශයට අනුව, මෙම සිද්ධිය වී ඇත්තේ තම ගැබිනි බිරිඳ සහ මව සමඟ පැමිණි පුද්ගලයකු කොටහේන ප්‍රදේශයේ අවන්හලක් අසල ආහාර මිලදී ගැනීම සඳහා තම මෝටර් රථය නතර කළ අවස්ථාවේදීය.

එම අවස්ථාවේ රථයේ එන්ජිම ක්‍රියාත්මක වෙමින් තිබි ඇති අතර රථයේ කාන්තාවන් දෙදෙනා සිටියදී ම සැකකරු වාහනයට නැඟ වේගයෙන් පලා ගොස් තිබේ.

සොරකම් කරන ලද මෝටර් රථය පිළිබඳ මට්ටක්කුලිය පොලිස් ස්ථානයේ නිලධාරීන්ට අනතුරු ඇඟවීමක් ලැබීමෙන් පසු ඔවුන් කැබ් රථයකින් මෝටර් රථය ලුහුබැඳ තිබේ.

රථය නැවැත්වීමට සංඥා කළද, සැකකරු දිගටම පලා යෑම නිසා නිලධාරීන් පිස්තෝලයකින් වෙඩි වට දෙකක් තබා ඇත.

අවසානයේ කොටහේන පොලිස් වසමේ බ්ලූමැන්ඩල් දුම්රිය මාර්ගය අසල වාහනය නතර කර සැකකරු පයින් පැනගොස් තිබේ.

කාන්තාවන් දෙදෙනා මෝටර් රථය තුළ සිටියදී හමු වී තිබිණි.

සැකකරු අත්අඩංගුවට ගැනීම සඳහා කොටහේන පොලිසිය සෝදිසි මෙහෙයුමක් ආරම්භ කර ඇති අතර වැඩිදුර විමර්ශන සිදු කරයි.