ආසියානු ක්‍රිකට් කවුන්සිලයේ සභාපතිවරයා ලෙස පිට පිට තුන්වැනි වසරටත් ජේ ෂා පත්කර තිබේ.

ආසියානු ක්‍රිකට් කවුන්සිලයේ මාධ්‍ය නිවේදනය පෙන්වා දෙන්නේ ජේ ෂාගේ සේවා දිගුව ශ්‍රී ලංකා ක්‍රිකට් සභාපති ෂම්මි සිල්වා විසින් දෙවැනි වරටත් යෝජනා කරන ලද අතර ආසියානු ක්‍රිකට් කවුන්සිලයේ සියලුම සාමාජිකයන් විසින් එම නාමයෝජනා ඒකමතිකව අනුමත කරන ලද බවයි.

ඉන්දීය ක්‍රිකට් පාලක මණ්ඩලයේ ලේකම් ද වන ෂා 2021 ජනවාරි මාසයේදී ආසියානු ක්‍රිකට් කවුන්සිලයේ සභාපති ලෙස ප්‍රථම වරට පත්විය.

“ආසියානු ක්‍රිකට් කවුන්සිලයේ අඛණ්ඩ විශ්වාසය වෙනුවෙන් මම කෘතඥ වනවා. ක්‍රීඩාව තවමත් ළදරු අවධියේ පවතින කලාප කෙරෙහි විශේෂ අවධානයක් යොමු කරමින් ක්‍රීඩාවේ සමස්ත සංවර්ධනය සහතික කිරීමට අප කැපවී සිටිය යුතුයි. ආසියාව පුරා ක්‍රිකට් පෝෂණය කිරීමට ආසියානු ක්‍රිකට් කවුන්සිලය කැපවී සිටිනවා,”යනුවෙන් ජේ ෂා පවසා ඇත.

ජේ ෂාගේ නායකත්වයෙන් ආසියානු ක්‍රිකට් කවුන්සිලය විසින් 2022 (T20 ) , 2023 (ODI )ආසියානු කුසලාන තරග දෙකක් සහ 2023/24 U-19 ආසියානු කුසලානය ජ්‍යෙෂ්ඨ පිරිමි කණ්ඩායම් සඳහා ආසියානු කුසලාන තරගයක් සංවිධානය කරන ලදී.

“ෂාගේ ධුර කාලය තුළ ආසියානු ක්‍රිකට් කවුන්සිලය මහාද්වීපය පුරා විවිධ කලාපවල ක්‍රිකට් ක්‍රියාකාරීව ප්‍රවර්ධනය කිරීම දැක තිබෙනවා. ක්‍රිකට් ක්ෂේත්‍රය පුළුල් කිරීමට ආසියානු ක්‍රිකට් කවුන්සිලයේ කැපවීම හේතුවෙන් ඇෆ්ගනිස්ථානය, භූතානය, කාම්බෝජය, චීනය, නේපාලය, තායිලන්තය, හොංකොං, ඉරානය, මැලේසියාව, මියන්මාරය, එක්සත් අරාබි එමීර් රාජ්‍යය, කුවේට්, බහරේනය, ඕමානය, කටාර්, සෞදි අරාබිය, සිංගප්පූරුව සහ අනෙකුත් නැගී එන ක්‍රිකට් ක්‍රීඩා කරන රටවල් වැඩි උනන්දුව ප්‍රදර්ශනය කර තිබෙනවා,” යනුවෙන් මාධ්‍ය නිවේදනයේ සඳහන් වෙයි.

“සාමාජික මණ්ඩල අතර සහයෝගීතාව වර්ධනය කිරීමට ඔහු සමත් වූ අතර ආසියානු ක්‍රිකට් කවුන්සිලයේ මූල්‍ය හා වාණිජ තත්ත්වය සැළකිව යුතු ලෙස ඉහළ නංවා තිබෙනවා. අද, ආසියානු ක්‍රිකට් කවුන්සිලය විසින් පවත්වනු ලබන තරඟාවලි සඳහා ආයෝජනය කිරීමේ වටිනාකම පාර්ශ්වකරුවන් දකින අතර, මෙම ප්‍රධාන පරිවර්තනය සඳහා මම ඔහුට ගෞරවය පුද කරනවා, එය කලාපයේ ක්‍රීඩාවේ වර්ධනයට තවදුරටත් ඉන්ධන සපයනු ඇති, ”යනුවෙන් ඕමාන් ක්‍රිකට් සභාපති සහ ආසියානු ක්‍රිකට් කවුන්සිලයේ උප සභාපති Pankaj Khimji පවසා තිබේ.