නීති විරෝධී පිරමීඩ යෝජනා ක්‍රමයක් සම්බන්ධයෙන් කෘෂිකර්ම පර්යේෂණ දෙපාර්තමේන්තුවේ සංවර්ධන නිලධාරීන් දෙදෙනෙකු වරදකරු කිරීමට මහේස්ත්‍රාත් අධිකරණය ගත් තීරණය අනුරාධපුර මහාධිකරණය තහවුරු කර තිබේ.

මොවුන් නීති විරෝධී පිරමීඩ යෝජනා ක්‍රමයක් සම්බන්ධයෙන් වරදකරු කෙරුණු මෙරට පළමු පුද්ගලයන් වේ.

සැකකරුවන් වසර 15ක් පුරා පැවති නඩුවකින් පසු වරදකරුවන් කරන ලදී.

රජයේ සේවකයන් ලෙස සේවය කරමින් සිටියදී පිරමීඩ යෝජනා ක්‍රමයක් ප්‍රවර්ධනය කිරීම සහ අලෙවි කිරීම සම්බන්ධයෙන් සැකකරුවන් මුලින් වැරදිකරුවන් විය.

මහාධිකරණ තීන්දුව මහේස්ත්‍රාත්වරයාගේ තීන්දුව තහවුරු කළ අතර, ඔවුන්ට වසර දෙකක බරපතළ සිර දඬුවමක් නියම කරන ලද අතර, එය වසර දහයකට අත්හිටුවා එක් අයකුට රුපියල් 500,000ක දඩය බැගින් ද නියම කරන ලදී.

2005 දෙසැම්බර් 15 වැනි දින පුබුදුපුර ප්‍රජා ශාලාවේදී පවත්වන ලද පිරමීඩ ආකාරයේ ව්‍යාපාරික සම්මන්ත්‍රණයක් සම්බන්ධයෙන් මූලික නඩුව ගොනු කර තිබිණි.

ශ්‍රී ලංකා මහ බැංකුව විසින් කරන ලද විමර්ශනවලින් හෙළි වූයේ සැකකරුවන් 1988 අංක 30 දරන බැංකු පනතේ 83(C)(2) වගන්තිය උල්ලංඝනය කරමින් නීති විරෝධී යෝජනා ක්‍රමයකට සාමාජිකයන් බඳවා ගෙන ඇති බවයි.

පළමු සැකකරු මෙම වංචාවට සම්බන්ධ වීමෙන් රුපියල් මිලියන 1.16ක් සහ දෙවැනි සැකකරු රුපියල් මිලියන 2ක් උපයා ඇති බව පැමිණිල්ල විසින් තහවුරු කර තිබිණි.

මෙම සාක්ෂි මත පදනම්ව, වසර ගණනාවක නඩු විභාගයකින් පසු මහේස්ත්‍රාත් කේ.එම්.ජේ.පී. සමරසිංහ සැකකරුවන් වරදකරුවන් බව තීරණය කළේය.

මහේස්ත්‍රාත්වරයාගේ තීන්දුවෙන් පසුව, වැරදිකරුවන් ඔවුන්ගේ වරදට එරෙහිව අභියාචනයක් ඉදිරිපත් කර තිබිණි.

කෙසේවෙතත්, අනුරාධපුර මහාධිකරණ විනිසුරු නලින් ද කාරියවසම් මෑතකදී අභියාචනය ප්‍රතික්ෂේප කරමින් කියා සිටියේ පහළ අධිකරණයේ තීන්දුව අවලංගු කිරීමට කිසිදු පදනමක් නොමැති බවයි.

අභියාචකයන් පැහැදිලිවම බැංකු රෙගුලාසි උල්ලංඝනය කර ඇති බවත්, පැමිණිල්ල සාධාරණ සැකයකින් තොරව ඔවුන්ගේ වරද තහවුරු කර ඇති බවත් මහාධිකරණය අවධාරණය කළේය.

නීතිපතිවරයා වෙනුවෙන් පෙනී සිටි අතිරේක සොලිසිටර් ජනරාල් දිලීප පීරිස් ඉදිරිපත් කළ තර්ක ද අධිකරණය සැළකිල්ලට ගත් අතර, අභියාචකයන්ගේ ක්‍රියාවන් බැංකු පනත සෘජුවම උල්ලංඝනය කිරීමක් බව තහවුරු කළේය.