මෙරට විශාලතම ගෑස් සැපයුම්කරු වන ලිට්‍රෝ සමාගම සහ එහි පර්යන්තය වන Litro Terminals (Pvt) Ltd පෞද්ගලික අංශයේ කොටස් බෙදාහැර ප්‍රතිව්‍යුහගතකරණය කිරීමේ ක්‍රියාවලිය අඛණ්ඩව සිදුකිරීමට නියමිත බව වාර්තා වේ.

පවතින ප්‍රතිව්‍යුහගතකරණය කිරීමේ ක්‍රියා පටිපාටිය යටතේ සමාගමේ සියලුම කොටස් හෝ වැඩි ප්‍රමාණයක් විකිණීමට රජය අදහස් කරන බව සහ පසුගිය පාලන සමයේ යෝජනා සඳහා ලංසු කැඳවා ඇති බව මුදල් අමාත්‍යාංශයේ උසස් නිලධාරියෙක් උපුටා දක්වමින් Sunday Morning වාර්තා කරයි.

ලංසු අවලංගු කිරීමට කිසිදු ක්‍රියාමාර්ගයක් ගෙන නොමැති අතර සමාගමේ බහුතරයක් හෝ එහි සියලුම කොටස් විකිණීම රජයේ අපේක්ෂාව බව ද එම නිලධාරියා පවසා තිබේ.

මෙය පැවැති ආණ්ඩුවෙන් ඉදිරිපත් කළ යෝජනාවලට අනුකූල වන අතර, උපායමාර්ගික ආර්ථික සැලැස්මක් යටතේ රජය සතු සමාගම් ප්‍රතිව්‍යුහගතකරණය කිරීම සඳහා වත්මන් ආණ්ඩුවේද උනන්දුව ප්‍රදර්ශනය කරයි.

ලංකා වාණිජ මණ්ඩලය විසින් සංවිධානය කරන ලද ශ්‍රී ලංකා ආර්ථික සමුළුවේ සමාප්ති සැසියේදී නියෝජ්‍ය මුදල් අමාත්‍ය හර්ෂණ සූරියප්පෙරුම, කිසිදු ආයතනයක් විශේෂ නම් කිරීමකින් තොරව රාජ්‍ය ව්‍යවසාය සම්බන්ධයෙන් රජයේ උපායමාර්ගය පිළිබඳව දීර්ඝ ලෙස අදහස් දක්වා තිබිණි.

ඇතැම් රාජ්‍ය සමාගම් රජය යටතේ තබාගන්නා අතර අනෙක් ඒවා පෞද්ගලීකරණය කරනු ඇති බව හෝ ඒවායේ ආකෘතීන් රාජ්‍ය පෞද්ගලික හවුල් ව්‍යුහයන් වැනි දෙමුහුන් ව්‍යුහයන් වෙත වෙනස් කරනු ඇති බව ඔහු එහිදී පැවැසුවේය.

ප්‍රතිව්‍යුහගතකරණය කිරීමේ කොටසක් ලෙස ලිට්‍රෝ ගෑස් ලංකා ලිමිටඩ් සහ එහි පර්යන්ත මෙහෙයුම්වල කොටස් අත්පත් කර ගැනීම සඳහා 2024 ජූලි මාසය වන විට ලංසුකරුවන් අටදෙනකු පසුගිය පාලනය විසින් තෝරාගෙන තිබිණි.

මෙම ලංසුකරුවන්ට ඔවුන්ගේ සැලසුම් පිළිබඳ සවිස්තරාත්මක යෝජනා ඉදිරිපත් කිරීමට ආරාධනා කර ඇත.

කෙසේවෙතත් පෞද්ගලීකරණ ක්‍රියාවලියක් අභියස වුව ද Litro Gas Lanka Ltd සුවිශේෂී ලෙස සිය මෙහෙයුම් සිදුකර තිබේ.

නිල දත්ත වලට අනුව, සමාගම එහි ප්‍රධාන කොටස් හිමියා වන ශ්‍රී ලංකා රක්ෂණ සංස්ථාව හරහා භාණ්ඩාගාරයට රුපියල් බිලියන 3 ක සම්පූර්ණ ලාභාංශයක් ප්‍රකාශයට පත්කර ඇත.