දැනට නිවසක් නොමැති සිවිල් ආරක්ෂක දෙපාර්තමේන්තුවේ සාමාජිකයන් සඳහා නිවාස ඉදිකිරීමට සහ පවතින නිවාස අලුත්වැඩියා කටයුතු සඳහා එම දෙපාර්තමේන්තුවේ ශ්‍රම සහාය ලබා දීමට රජය තීරණය කර ඇත.

ආරක්ෂක රාජ්‍ය ඇමැති ප්‍රමිත බණ්ඩාර තෙන්නකෝන්ගේ සෘජු මැදිහත්වීම මත මෙය සිදු කෙරෙන බව වාර්තා වේ.

ඒ අනුව, ආරම්භක අදියරේදී සිවිල් ආරක්ෂක දෙපාර්තමේන්තුවේ සාමාජිකයන් 100 දෙනෙකුට මෙම වැඩසටහනෙන් ප්‍රතිලාභ ලැබෙනු ඇත.

සවිස්තරාත්මක අයදුම්පත් සිවිල් ආරක්ෂක දෙපාර්තමේන්තුවේ අධ්‍යක්ෂ ජනරාල් වෙත ඉදිරිපත් කරන එම දෙපාර්තමේන්තුවේ සාමාජිකයන්ට දැනුම් දී ඇති බව රාජ්‍ය ඇමැති ප්‍රමිත බණ්ඩාර තෙන්නකෝන් පවසයි.

නිශ්චිත නිර්ණායක හරහා තෝරාගත් සාමාජිකයන්ට අවශ්‍ය පහසුකම් ලබාදීමට මේ යටතේ කටයුතු කරනු ඇත.

තවද, සිවිල් ආරක්ෂක දෙපාර්තමේන්තුව වෙතින් කළ ඉල්ලීමට ප්‍රතිචාර වශයෙන්, රජය විසින් දෛනික සලාක දීමනාව රු. 350 සිට රු. 500 දක්වා ඉහළ නංවා ඇත.

රටේ වත්මන් ආර්ථික වාතාවරණය සළකා බලා ඉහත වැඩිවීම ක්‍රියාත්මක කරන බවත් එය සිවිල් ආරක්ෂක දෙපාර්තමේන්තුවේ සාමාජිකයන්ගේ ජීවන තත්ත්වය ස්ථාවර කර ගැනීමට යම් ප්‍රමාණයකට ඉවහල් වන බවත් රාජ්‍ය ඇමැති තෙන්නකෝන් වැඩිදුරටත් පවසයි.