November 21, 2024
යාපනයේ නැඟී එන දක්ෂ ක්‍රිකට් ක්‍රීඩකයන්ට සහයෝගය ලබාදෙමින් ජනප්‍රිය ක්‍රිකට් ක්‍රීඩක කුමාර් සංගක්කාර රංජිත්කුමාර් නිව්ටන්, කේ.මාතුලන්, වී.ආකාෂ් ඇතුළු ක්‍රීඩකයන්ට ක්‍රිකට් ආම්පන්න පරිත්‍යාග කර තිබේ.
දඹුල්ල ප්‍රදේශයේ තරුණ තේරීම් සම්බන්ධීකාරක සහ ජ්‍යෙෂ්ඨ මාධ්‍යවේදී රන්ජන් පරණවිතානගේ ඉල්ලීමකට අනුව මෙම ත්‍යාගශීලී ක්‍රියාව සංගක්කාර සිදු කර ඇත.
සංගක්කාරගේ කාලෝචිත දායකත්වය මෙම ක්‍රීඩකයන්ගේ සාර්ථකත්වය කරා යන ගමන සැළකිව යුතු ලෙස ශක්තිමත් කර තිබේ.
නිව්ටන් සහ මාතුලන් ශ්‍රී ලංකා වයස අවුරුදු 19න් පහළ ආසියානු කුසලානය නියෝජනය කරන අතර ආකාෂ් බංග්ලාදේශ තරඟාවලිය සඳහා 17න් පහළ සංචිතයට එක්ව සිටී.
ජ්‍යෙෂ්ඨ මාධ්‍යවේදී රන්ජන් පරණවිතාන මේ සම්බන්ධයෙන් සිය ප්‍රසාදය පළකර ඇත.
“වමතින් වේගපන්දු යවන යාපනය මධ්‍ය මහා විද්‍යාලයේ ක්‍රීඩක රංජිත්කුමාර් නිව්ටන්, දකුණත් වේග පන්දු යවන ශාන්ත ජෝන් විද්‍යාලයේ ක්‍රීඩක කේ.මාතුලන් සහ දකුණත් පා දඟ පන්දු යවන පේදුරුතුඩුව හාට්ලි විද්‍යාලයේ ක්‍රීඩක වී.ආකාෂ් විශිෂ්ට දස්කම් දැක්වීමට සමත්ව ඇත.
ආසියානු කුසලාන තරඟාවලිය සඳහා තරඟ වැදීමට නියමිත ශ්‍රී ලංකා වයස අවුරුදු 19න් පහළ කණ්ඩායමට නිව්ටන් සහ මතුලන් තෝරාගෙන ඇති අතර, බංග්ලාදේශයට එරෙහි තරඟාවලියේදී ආකාෂ් ශ්‍රී ලංකා වයස අවුරුදු 17න් පහළ කණ්ඩායම නියෝජනය කරනු ඇත.
ශ්‍රී ලංකාවේ ජාතික යොවුන් කණ්ඩායම් නියෝජනය කිරීමට යාපනයෙන් ක්‍රීඩකයන් තිදෙනෙකු තෝරා ගත් පළමු අවස්ථාව මෙයයි – එය එම කලාපය සඳහා ඓතිහාසික ජයග්‍රහණයක්.
මීට වසර කිහිපයකට පෙර වියස්කාන්ත් යොවුන් පිලට ක්‍රීඩා කිරීමේ ගෞරවයද හිමිකර ගත්තේ මෙවැනි ජයග්‍රහණයක පූර්වාදර්ශයක් තබමිනි.
පළාත් මට්ටමින් තම සුපිරි දස්කම් පෙන්වූ දඹුල්ල කණ්ඩායමේ සිට ජාතික තලයේ ස්ථානයක් දක්වා මෙම දක්ෂ ක්‍රීඩකයන් ඉදිරියට යෑම ඇත්තෙන්ම ආශ්වාදයක්.
මගේ ඉල්ලීමට අනුව සති කිහිපයකට පෙර එක්සත් රාජධානියේ සිටින මෙම තරුණ දක්ෂයන් තිදෙනාට සහ අනෙකුත් දඹුල්ල ක්‍රීඩකයන්ට නොමසුරුව ක්‍රිකට් ආම්පන්න පරිත්‍යාග කිරීම ගැන කුමාර් සංගක්කාරට හෘදයාංගම ස්තූතිය. ඔබගේ සහයෝගය සැළකිව යුතු බලපෑමක් ඇති කර ඇත!” යනුවෙන් රන්ජන් පරණවිතාන සමාජ මාධ්‍යයේ සටහනක් තබමින් ප්‍රකාශ කර ඇත.
