මෙරට ආගමික සහජීවනයට හානි වන අයුරින් ප්‍රකාශ කළායැයි කියන රාජාංගණේ සද්ධාරතන හිමියන් ඇප මත මුදාහැරීමේදී, අසභ්‍ය වචනයෙන් ප්‍රකාශ කිරීම වළක්වාලමින් කොළඹ කොටුව මහේස්ත්‍රාත්වරයා විසින් ඊයේ (12) ඇප කොන්දේසියක් පනවා ඇත.

සිවිල් හා දේශපාලන අයිතිවාසිකම් පිළිබඳ අන්තර්ජාතික සම්මුති පනත (ICCPR) යටතේ වැරදි සිදු කළ බවට චෝදනා කරමින් දින 45ක සිරගත කිරීමෙන් පසු සැකකාර හිමිනම රුපියල් ලක්ෂ පහක ශරීර ඇප දෙකක් මත මුදා හැරීමට මහේස්ත්‍රාත් තිළිණ ගමගේ නියෝග කර තිබේ.

මේ අතර, මහේස්ත‍්‍රාත්වරයා නිරීක්ෂණය කර ඇත්තේ, හිමිනම කළා යැයි කියන වරද ICCPR පනතේ සීමාවට අයත් නොවන නමුත්, පරිගණක අපරාධ පනත සහ දණ්ඩ නීති සංග‍්‍රහය යටතේ චෝදනා ගොනු කළ හැකි බවය.

පසුගිය මැයි 28 වැනිදා සද්ධාරතන හිමියන් අපරාධ පරීක්ෂණ දෙපාර්තමේන්තුව (CID) විසින් අත්අඩංගුවට ගෙන ඇත්තේ, රටේ ආගමික සහජීවනයට බාධා වන ආකාරයේ ප්‍රකාශ නිකුත් කිරීම හේතුවෙනි.