සිරගතව සිටි විපක්ෂ නායක ඇලෙක්සි නවාල්නි (47) එරට උතුරු ප්‍රදේශයේ උපරිම ආරක්‍ෂිත බන්ධනාගාරයක් තුළදී මියගොස් ඇති බව රුසියාවේ බන්ධනාගාර සේවය පවසයි.

රුසියානු ෆෙඩරල් බන්ධනාගාර සේවය නිවේදනයක් නිකුත් කරමින් කියා සිටියේ ජනාධිපති ව්ලැඩිමීර් පුටින්ගේ ප්‍රමුඛතම විරුද්ධවාදියා වන ඇලෙක්සි නවාල්නි අද උදෑසන ඇවිදීමෙන් පසු අසනීප වී සිහිය නැති වූ බවයි.

ඔහුව ප්‍රතිකාර සඳහා රැගෙන යෑමට ගිලන් රථයක් පැමිණි නමුත් ඔහු මියගොස් ඇති බව ප්‍රකාශ කෙරී ඇත.

“ඇවිදීමෙන් පසු නවාල්නිට අසනීප විය. වහාම සිහිය නැතිවිය. වෛද්‍ය කාර්ය මණ්ඩලය වහාම පැමිණ ගිලන් රථ කණ්ඩායමක් කැඳවා ඇත. ධනාත්මක ප්රතිඵල ලබානොදුන් නැවත පණ ගැන්වීමේ පියවරයන් සිදුකරන ලදී. වෛද්‍යවරු වරදකරුගේ මරණය තහවුරු කළහ. මරණයට හේතු තහවුරු වෙමින් පවතිනවා” යනුවෙන් එම නිවේදනයේ දැක්වේ.

නවාල්නිගේ මරණය පිළිබඳව ජනාධිපති ව්ලැඩිමීර් පුටින්ට දැනුම් දී ඇති බව රාජ්‍ය ප්‍රවෘත්ති ඒජන්සිය TASS වාර්තා කර තිබේ.

නවාල්නි රඳවා සිටියේ ආක්ටික් කවයට උතුරින් පිහිටි දණ්ඩ යටත්විජිතයක ය.

මොස්කව් සිට ඊසාන දෙසින් කිලෝමීටර් 1,900 (සැතපුම් 1200) පමණ දුරින් යමලෝ-නෙනෙට්ස් කලාපයේ ඛාර්ප් හි පිහිටා ඇති IK-3 දණ්ඩ යටත්විජිතය රුසියාවේ දුෂ්කරම බන්ධනාගාරවලින් එකක් ලෙස සැලකේ.