January 11, 2025
යුක්රේන-රුසියා ගැටුමේදී මියගිය හිටපු හමුදා නිලධාරීන් කිහිපදෙනෙකුගේ අනන්‍යතාව තහවුරු කිරීම සඳහා රුසියාව ශ්‍රී ලංකාවේ සහාය ඉල්ලා තිබේ.
වන්දි ගෙවීම සඳහා මාර්ගය සකස් කිරීම සඳහා DNA පරීක්ෂණ හරහා මියගිය නිලධාරීන් හඳුනා ගැනීමට පහසුකම් සපයන ලෙස රුසියාව අදාළ බලධාරීන්ගෙන් ඉල්ලා ඇති බව වාර්තා වෙයි.
මියගිය සහ තුවාල ලැබූ අයට ප්‍රමාණවත් වන්දි ලබා දෙන බවට රුසියාව පසුගිය රජයට සහතික වී තිබිණි.
2022 පෙබරවාරි මාසයේ දේ යුක්රේන-රුසියා සටන් තීව්‍ර වීමෙන් පසු රුසියාව විසින් හමුදාවට බඳවා ගන්නා ලද අය අතර හිටපු ශ්‍රී ලංකා හමුදා නිලධාරීන් ද විය.
දැනට වාර්තා වන පරිදි මියගිය පුද්ගලයන් හඳුනා ගැනීම තහවුරු කිරීම ප්‍රමාද වීම හේතුවෙන් වන්දි ගෙවීම නතර කර ඇත.
මියගිය පුද්ගලයන් පස් දෙනෙකුගේ අනන්‍යතාවන් තහවුරු කරන ලෙස රුසියාව ඉල්ලා ඇති බව වාර්තා වේ.
කෙසේවෙතත් මුළු මරණ සංඛ්‍යාව තවමත් පැහැදිලි නැත.
මේ වන විට අවම වශයෙන් හිටපු හමුදා නිලධාරීන් 20 දෙනෙකු මිය ගොස් ඇති බවට විවිධ වාර්තා පළ වී තිබිණි.
පසුගිය සැප්තැම්බර් මාසයේ පැවති ජනාධිපතිවරණයට පෙර, එවක රජය 2024 ජුනි මස අගදී මෙම ගැටලුව සාකච්ඡා කිරීම සඳහා රුසියාවට නියෝජිත පිරිසක් යොමු කිරීමට කටයුතු කළේය.
මොස්කව්හි පැවති සාකච්ඡා අවසානයේ ශ්‍රී ලංකා තානාපති කාර්යාලය පැවසුවේ ශ්‍රී ලාංකිකයන්ගේ ගැටලු විසඳීම සඳහා දෙපාර්ශ්වයේ නිලධාරීන්ගෙන් සමන්විත ඒකාබද්ධ ක්‍රියාකාරී කමිටුවක් පිහිටුවීමට ශ්‍රී ලංකාව යෝජනා කළ බවයි.
නියෝජිත පිරිසට විදේශ කටයුතු රාජ්‍ය ඇමැති තාරක බාලසූරිය සහ ආරක්ෂක ලේකම් ජෙනරාල් (විශ්‍රාමික) කමල් ගුණරත්න ඇතුළත් විය.
නියෝජිත පිරිස රුසියානු සමූහාණ්ඩුවේ නියෝජ්‍ය විදේශ කටයුතු ඇමැති ඇන්ඩ්‍රි රුඩෙන්කෝ සහ රුසියානු සමූහාණ්ඩුවේ නියෝජ්‍ය ආරක්ෂක ඇමැති කර්නල් ජෙනරාල් ඒ.වී. ෆොමින් හමු වී තිබිණි.
විපක්ෂ මන්ත්‍රීවරුන් දෙදෙනෙකු වන දයාසිරි ජයසේකර සහ ගාමිණී වලේබෝඩ ද නියෝජිත පිරිස සමඟ එක් වූහ.
නොවැම්බර් මාසයේ පැවති පාර්ලිමේන්තු මැතිවරණයෙන් පසු බලයට පැමිණි ජාතික ජන බලවේග රජයට රුසියාව විසින් දැනට පවතින මෙම ගැටලුව ඉදිරිපත් කර ඇති බව වාර්තා වේ.
