බ්‍රසීලයේ හිටපු සුපිරි පාපන්දු ක්‍රීඩක රොනාල්ඩෝ නසාරියෝ ශ්‍රීලන්කන් ගුවන් සේවයේ ගුවන් යානයකදී ලබාගත් ඡායාරූපයක් ශ්‍රීලන්කන් ගුවන් සමාගම එහි සමාජ මාධ්‍ය ඔස්සේ පළකර තිබේ.

එම ඡායාරූපය සඳහා ඔහු ගුවන් යානයේ ශ්‍රී ලංකන් ගුවන් සේවයේ කාර්ය මණ්ඩලය සමඟ පෙනීසිට ඇත.

“හිටපු බ්‍රසීලයේ වෘත්තීය පාපන්දු ක්‍රීඩකයා ශ්‍රීලන්කන් ගුවන් සේවය සමඟ සුවපහසු ගමනකට එක්විය. ඔබ අප සමඟ ගමන් කිරීම සතුටක්” යැයි ඡායාරූපය පළකරමින් ශ්‍රීලන්කන් ගුවන් සමාගම සමාජ මාධ්‍ය සටහනේ සඳහන් කර තිබේ.

R9 යන අන්වර්ථ නාමයෙන් හඳුන්වනු ලබන රොනාල්ඩෝ, අන්තර්ජාතික පාපන්දු ක්‍රීඩාවේ සර්ව කාලීන විශිෂ්ඨයකු ලෙස සැළකේ.

ක්‍රීඩාවට නව මානයක් ගෙන ආ රොනාල්ඩෝ සුපිරි ප්‍රහාරකයකු ලෙස ලොව පිළිගැනීමට ලක්ව සිටින අතර, ඔහු ක්‍රීඩාවෙන් පරම්පරාවකට බලපෑමක් එල්ල කළ අයකු ලෙස ද සැළකේ.

ඔහුගේ පෞද්ගලික සාර්ථකත්වයන් අතර, අවස්ථා තුනකදී FIFA වසරේ ලෝක ක්‍රීඩකයා ලෙස නම්කිරීම සහ Ballon d’Or සම්මාන දෙකක් දිනාගැනීම ඇතුළත් වේ.