July 28, 2024
මියන්මාරයේ ත්‍රස්තවාදී සයිබර් අපරාධ ප්‍රදේශයේ කඳවුරක බලහත්කාර අපරාධ ක්‍රියාකාරකම් සඳහා වහල්භාවයේ සිටින ශ්‍රී ලාංකිකයන් පිරිස මුදා ගැනීමට පහසුකම් සපයන ලෙස ශ්‍රී ලංකාව මියන්මාරයෙන් ඉල්ලා තිබේ.
තොරතුරු තාක්ෂණ ක්ෂේත්‍රයට අදාළ රැකියා සඳහා ශ්‍රී ලාංකිකයන් 56 දෙනෙකුගෙන් යුත් කණ්ඩායමක් තායිලන්තයට ගෙන්වාගෙන ඔවුන් මියන්මාරයේ ත්‍රස්තවාදී කණ්ඩායමක් විසින් ක්‍රියාත්මක කරන සයිබර් අපරාධ ප්‍රදේශයේ කඳවුරක සිරකර තබාගෙන සිටි බව පසුගිය වසරේ දෙසැම්බර් මාසයේදී වාර්තා විය.
මෙම වසරේ අප්‍රේල් මාසයේදී මෙම සයිබර් වංචාවෙන් මුදාගත් ශ්‍රී ලාංකිකයන් අට දෙනෙකු නිරුපද්‍රිතව ශ්‍රී ලංකාවට ගෙන්වා ගැනීමට හැකි වී තිබිණි.
ආරක්ෂක ලේකම් ජෙනරාල් කමල් ගුණරත්න මියන්මාර අගමැති මින් අවුන්ග් හ්ලේන්ග් හමුවී, සිරගතව සිටින ශ්‍රී ලාංකිකයන් මුදාගැනීම සඳහා සහාය ඉල්ලා සිටියේය.
ශ්‍රී ලංකාවේ නිලධාරීන් සමඟ සහයෝගයෙන් කටයුතු කිරීමටත්, මෙම ගැටලුව විසඳීමට ප්‍රමුඛත්වය දීමටත් මියන්මාර රජය කැපවී සිටින බව එරට අගමැතිවරයා අවධාරණය කර ඇත.
බිම්ස්ටෙක් ජාතික ආරක්ෂක ප්‍රධානීන්ගේ 4 වැනි රැස්වීමට සමගාමීව ආරක්ෂක ලේකම්වරයා මියන්මාර අගමැතිවරයා හමුවී තිබිණි.
මෙම හමුවේදී දෙරට අතර මිත්‍ර සබඳතා, රාජ්‍ය තාන්ත්‍රික සබඳතා සහ ආගමික කටයුතු සම්බන්ධයෙන් ද්විපාර්ශ්වික සහයෝගීතාව, අභ්‍යාසලාභීන් හුවමාරු කර ගැනීම සහ සහයෝගීතාව වර්ධනය කර ගැනීම පිළිබඳව ද සාකච්ඡා කර ඇත.
