October 27, 2024
ලබන අඟහරුවාදා කොළඹදී පැවැත්වෙන හයවැනි ඉන්දු-ලංකා ඒකාබද්ධ ක්‍රියාකාරී කණ්ඩායම් රැස්වීමේදී මෙරට උතුරු මුහුදු තීරයේදී ඉන්දීය ධීවරයින් විසින් නීතිවිරෝධී බොටම් ට්‍රෝලින් ක්‍රමය මගින් මසුන් ඇල්ලීමට එරෙහිව දැඩි ක්‍රියාමාර්ග ගන්නා බවට ශ්‍රී ලංකා රජය සිය ස්ථාවරය නැවත අවධාරණය කිරීමට නියමිත බව වාර්තා වේ.
“තවදුරටත් උතුරේ ඉන්දියානු බොටම් ට්‍රෝලර් යාත්‍රා 400-500ක් විසින් සතියකට දින තුනක් අපේ සාගර සම්පත් සූරාකෑමට ඉඩදිය නොහැකියි,” ධීවර අමාත්‍යාංශයේ ලේකම් එම්.පී.එන්.එම්. වික්‍රමසිංහ ජනමාධ්‍ය වෙත පවසා ඇත.
එම රැස්වීමට සහභාගී වන ලේකම්වරයා පවසන්නේ, ඉන්දියානු සාගර ටූනා කොමිසම පවා සාගර සම්පත් කෙරෙහි බොටම් ට්‍රෝලිං ක්‍රමයේ දිගුකාලීන බලපෑම සහ ගැඹුරු මුහුදේ සාගර සමතුලිතතාවයේ වැදගත්කම මෙන්ම විවිධත්වය පෙන්වා දී ඇති බවයි.
නව නීති යටතේ අත්අඩංගුවට ගත් ඉන්දීය ධීවරයන්ට නඩු පැවරීමට සහ ඔවුන්ගේ යාත්‍රා අත්අඩංගුවට ගැනීමට අමාත්‍යාංශය දැඩි ක්‍රියාමාර්ග ගෙන ඇති බවත්, අත්අඩංගුවට ගත් ධීවරයින්ට විශාල දඩ මුදල් සහ සිරදඬුවම් නියම කළ බවත් ඔහු පවසයි.
කොළඹට පැමිණෙන ඉන්දීය දූත පිරිස මධ්‍යම ධීවර, සත්ව පාලන සහ කිරි නිෂ්පාදන අමාත්‍යාංශයේ සහ තමිල්නාඩු ප්‍රාන්ත රජයේ ජ්‍යෙෂ්ඨ නිලධාරීන්ගෙන් සමන්විත වේ.
2016 වසරේ සිට මේ දක්වා ඉන්දු-ලංකා ඒකාබද්ධ ක්‍රියාකාරී කණ්ඩායම් රැස්වීම් වට පහක් පවත්වා ඇත.
අවසාන රැස්වීම 2022 මාර්තු 22 වැනි දින පැවැත්වූ අතර ඒ සඳහා ශ්‍රී ලංකාව විසින් සත්කාරකත්වය දරන ලදී.
මේ අතර, කච්චතිව් දූපතේ නීතිවිරෝධී ලෙස මසුන් ඇල්ලූ ඉන්දීය ධීවරයින් 16 දෙනකු බොටම් ට්‍රෝලර් යාත්‍රා දෙකක් සමඟ බදාදා අත්අඩංගුවට ගෙන තිබේ.
ඔවුන් සිකුරාදා අධිකරණයට ඉදිරිපත් කිරීමෙන් පසු නොවැම්බර් 6 වැනිදා දක්වා රක්ෂිත බන්ධනාගාරගත කෙරිණි.
