මාදුරුඔය ජාතික වනෝද්‍යානය තුළදී මොණරකු මරා මස් පුළුස්සා ආහාරයට ගැනීමේ සිද්ධියට සම්බන්ධ සැකකරුවන් කඩිනමින් අත්අඩංගුවට ගැනීමට සැලසුම් කර ඇති බව වනජීවී සංරක්ෂණ දෙපාර්තමේන්තුව පවසයි.

හේනානිගල වනජීවී නියාමක ඩබ්ලිව්.එම්. කුමාරසිරි විජේකෝන් පසුගිය සතියේ ඉදිරිපත් කළ තොරතුරු සළකා බැලූ මහියංගන මහේස්ත්‍රාත්වරයා මාදුරුඔය ජාතික වනෝද්‍යානයට අනවසරයෙන් ඇතුළු වී මොණරකු ඝාතනය කර ආහාරයට ගන්නා දර්ශන YouTube හි පළ කළ විදේශිකයකු ඇතුළු 6 දෙනෙකු අත්අඩංගුවට ගන්නා ලෙස නියෝග කළේය.

පොලිස් මාධ්‍ය ප්‍රකාශක සහ නියෝජ්‍ය පොලිස්පති නිහාල් තල්දූව පවසන්නේ අදාළ අත්අඩංගුවට ගැනීම් සිදුකරනු ලබන්නේ වනජීවී සංරක්ෂණ දෙපාර්තමේන්තුව වන බැවින් ඊට පොලිසිය සම්බන්ධ නොවන බවයි.

ඒ අනුව සැකකරුවන් කඩිනමින් අත්අඩංගුවට ගැනීමට සැලසුම් කර ඇති බව හේනානිගල වනජීවී නියාමක ඩබ්ලිව්.එම්. කුමාරසිරි විජේකෝන් පවසා තිබේ.

“අඟහරුවාදා (18) නිලධාරීන් කණ්ඩායමක් මහියංගන, දඹාන ප්‍රදේශයට ගොස් සැකකරුවන්ගේ අනන්‍යතාව තහවුරු කර ගත්තා, ඔවුන් වැදි ප්‍රජාවේ නියෝජ්‍ය නායකයකු ද හමු වී තිබුණා, සැකකරුවන් කර ඇත්තේ නීති විරෝධී ක්‍රියාවක් බව ඔහුත් පිළිගත්තා” යනුවෙන් ඔහු ප්‍රකාශ කර තිබේ.

වනජීවීන් සම්බන්ධ නීතිමය ප්‍රතිපාදන සැමට එකසේ අදාළ වන බවත් වැදි ප්‍රජාවට සතුන් මැරීමට කිසිදු අවසරයක් ලබාදී නොමැති බවත් ඔහු අවධාරණය කර තිබේ.

“සතුන් මැරීම සහ ඔවුන්ගේ මස් විකිණීම නීති විරෝධීය. මෙය සෑම කෙනෙකුටම අදාළ වන නීතියක්. වැද්දන් වනාන්තර ප්‍රදේශවල ජීවත් වූ පමණින් ඔවුන්ට සතුන් මරා දැමිය නොහැකියි” යැයි ද ඔහු පැහැදිලි කර ඇත.

2019 හෝ 2020 දී සිදු වූවා යැයි විශ්වාස කෙරෙන මෙම සිද්ධිය වීඩියෝවක් හේතුවෙන් සමාජ මාධ්‍ය වේදිකාවල පුළුල් අවධානයක් දිනා ගැනීමෙන් පසුව, මිලියන අටකට අධික දර්ශන නැරඹුම් පසුකර ඇති අතර ඊට මහජන විරෝධයක් එල්ල වීමෙන් පසුව මෑතකදී නිල පරීක්ෂණයකට හේතුවක් බවට පත් විය.

ආදිවාසී සැකකරුවන් නීතිය යටතේ ආරක්ෂිත විශේෂයක් වන මොණරා අල්ලා ගැනීම සඳහා දුනු ඊතල වැනි සාම්ප්‍රදායික දඩයම් මෙවලම් භාවිත කර ඇති බව පැවසේ.

වීඩියෝවේ, මී මැස්සන්ගේ මී පැණිවල ගිල්වීම ඇතුළු ප්‍රජාවේ සාම්ප්‍රදායික පිළිවෙත්වලට අනුකූලව මොණරා පුළුස්සා ආහාරයට ගන්නා ආකාරය නිරූපණය කර ඇත.