2024 සැප්තැම්බර් ජනාධිපතිවරණයට ඉදිරිපත් වූ අපේක්ෂකයන්ට මෙන්ම ඔවුන් නම් කළ දේශපාලන පක්ෂවලට සහ ස්වාධීන කණ්ඩායම්වලට මැතිවරණ වියදම් වාර්තා ඉදිරිපත් නොකිරීම සම්බන්ධයෙන් නඩු 13ක් පවරා ඇති බව මැතිවරණ කොමසාරිස් ජනරාල් සමන් ශ්‍රී රත්නායක පවසයි.

එවැනි නීතිමය ක්‍රියාමාර්ගවලට මුහුණ දී සිටින පුද්ගලයන් අතර හිටපු ජනාධිපති රනිල් වික්‍රමසිංහ විසින් ජනාධිපතිවරණයට ඉදිරිපත් කළ ඔහුගේ සොහොයුරා වන චන්න වික්‍රමසිංහ ද සිටින බව මැතිවරණ කොමසාරිස් ජනරාල්වරයා සඳහන් කරයි.

මෙම නඩු 13 න් තුනක් සැප්තැම්බර් 21 ජනාධිපතිවරණයට තරඟ කළ නමුත් ඔවුන්ගේ වියදම් වාර්තා ඉදිරිපත් නොකළ අපේක්ෂකයින් සම්බන්ධයෙන් බව ද මැතිවරණ කොමසාරිස් ජනරාල්වරයා පවසයි.

ඔවුන්ට එරෙහිව පොලිසිය නීතිමය කටයුතු ආරම්භ කර ඇති බවද කොමසාරිස් ජනරාල්වරයා වැඩිදුරටත් අනාවරණය කරයි.

ප්‍රචාරක මූල්‍ය රෙගුලාසි යටතේ, මැතිවරණ කොමිසමට වාර්තා දෙකක් ඉදිරිපත් කළ යුතුය.

ඉන් එකක් අපේක්ෂකයා විසින් ද අනෙක තම අපේක්ෂකත්වය යෝජනා කළ දේශපාලන පක්ෂය හෝ පුද්ගලයා විසිනි.

ස්වාධීන අපේක්ෂකයන් සඳහා වියදම් වාර්තාව ඉදිරිපත් කිරීමේ වගකීම යෝජකයා සතු වන අතර පක්ෂ අපේක්ෂකයන් සඳහා අදාළ පක්ෂයේ මහලේකම්වරයා වාර්තාව ඉදිරිපත් කළ යුතුය.

අදාළ වාර්තාව ඉදිරිපත් කිරීමේ අවසාන දිනය 2024 ඔක්තෝබර් 13 ලෙස දක්වා තිබිණි.

2024 අගෝස්තු 16 දිනැති ගැසට් නිවේදනයට අනුව, සෑම ජනාධිපති අපේක්ෂකයෙකුටම ප්‍රචාරක කටයුතු සඳහා එක් ඡන්දදායකයෙකුට උපරිම වශයෙන් රුපියල් 109ක් වැයකිරීමට අවසර දී ඇත.

වියදම් සීමාව අපේක්ෂකයා සඳහා 60%ක් ලෙසද, දේශපාලන පක්ෂය හෝ යෝජනා කරන්නා තම ප්‍රචාරක ව්‍යාපාරය හසුරුවන අය සඳහා 40%ක් ලෙසද නියමකර ඇත.

තම අපේක්ෂකයන් වියදම් වාර්තා ඉදිරිපත් කර ඇතත්, දේශපාලන පක්ෂ හෝ ස්වාධීන කණ්ඩායම් හතක් එම වාර්තා ඉදිරිපත් කිරීමට අපොහොසත් වී ඇති බව ද මැතිවරණ කොමසාරිස් ජනරාල් සමන් ශ්‍රී රත්නායක පෙන්වාදෙයි.