හිටපු ජනාධිපති රනිල් වික්‍රමසිංහ අද (28) නේපාලය බලා පැමිණෙන බව එරට මාධ්‍ය වාර්තා කර තිබේ.

ඔහු සිය පෞද්ගලික සංචාරයක් සඳහා නේපාලයට පැමිණීමට නියමිත බව එරට විදේශ කටයුතු අමාත්‍යාංශයේ ප්‍රකාශක ක්‍රිෂ්ණ ප්‍රසාද් ධකල් ප්‍රකාශ කර ඇත.

හිටපු ජනාධිපතිවරයා ලෙස ඔහුට අවශ්‍ය ක්‍රියාපටිපාටිය සහ ආරක්ෂක විධිවිධාන සලසන බව එම අමාත්‍යාංශය පවසයි.

ඔහු තම සැලසුම් අනුව සංචාරයන් සිදුකිරීමට නියමිතය.

හිටපු ජනාධිපතිවරයා නේපාලයේ රැඳී සිටින කාලය තුළ ලුම්බිණිය නැරඹීමට ද නියමිතය.

ඔහු සිය සංචාරය නිමවා ජනවාරි 01 වැනිදා යළි මෙරටට පැමිණීමට නියමිත බව වාර්තා වේ.

නේපාලය සහ ශ්‍රී ලංකාව 1957 ජූලි 1 වැනි දින රාජ්‍ය තාන්ත්‍රික සබඳතා ආරම්භ කර ඇත.

නේපාලය 1975 දී ගෞරවනීය කොන්සල් ජනරාල් කාර්යාලයක් කොළඹ විවෘත කළ අතර නේපාල තානාපති කාර්යාලය 1995 දී කොළඹ පිහිටුවන ලදී.

ශ්‍රී ලංකාවට 1993 සිට කත්මණ්ඩු හි නේවාසික තානාපති කාර්යාලයක් ඇත.

නේපාලය සහ ශ්‍රී ලංකාව යන රටවල් දෙකම කලාපීය සහයෝගීතාව සඳහා වූ දකුණු ආසියානු සංගමයේ (SAARC) ආරම්භක සාමාජිකයන් වන අතර බහු ආංශික තාක්ෂණික සහ ආර්ථික සහයෝගීතාව සඳහා බෙංගාල බොක්ක ප්‍රවේශයේ (BIMSTEC) සාමාජිකයන් ද වේ.

එක්සත් ජාතීන්ගේ සංවිධානය, නොබැඳි ජාතීන්ගේ ව්‍යාපාරය සහ ලෝක වෙළඳ සංවිධානය ඇතුළු විවිධ සංසදවලදී දෙරට අන්තර්ජාතික ගැටලු රාශියක් සම්බන්ධයෙන් පොදු අදහස් බෙදා ගනී.

බුදුන් වහන්සේ උපන් ස්ථානය සහ ලොව පුරා සිටින බෞද්ධයන්ගේ පූජනීය ගමනාන්තය වන ලුම්බිණියට සෑම වසරකම ශ්‍රී ලංකාවෙන් බෞද්ධ වන්දනාකරුවන් රැසක් පැමිණේ.

ලෝක සාමයේ මූලාශ්‍රයක් ලෙස ලුම්බිණිය සංවර්ධනය කිරීමට නේපාලයේ උත්සාහයට ශ්‍රී ලංකා රජය සහාය දක්වයි.

ශ්‍රී ලංකාව විසින් ලුම්බිණියේ ආරාමයක් සහ තානායම් සංකීර්ණයක් ද ඉදිකර ඇත.