ජනාධිපති රනිල් වික්‍රමසිංහ සමඟ ඊයේ පැවැති සාකච්ඡාවේදී ශ්‍රී ලංකා පොදුජන පෙරමුණ ඉදිරි ජනාධිපතිවරණයේදී ඔහුට සහාය දැක්වීමට පෙර ඉටුකළ යුතු ප්‍රධාන කරුණු සම්බන්ධයෙන් අවධානය යොමුකිරීමේ අවශ්‍යතාව අවධාරණය කළ බව විශ්වාස කටයුතු ආරංචි මාර්ගවලින් වාර්තා වේ.

ජනාධිපති නිල නිවසේ දී මුලින් සැලසුම් කර තිබූ මෙම හමුව ජනාධිපති ලේකම් කාර්යාලය වෙත ස්ථානය වෙනස් කිරීමක් දක්නට ලැබිණි.

මෙම සාකච්ඡාව පෙර දැනුම්දීමකින් තොරව රැස්වීම සර්ව පාක්ෂික රැස්වීමක් බවට පත්කිරීමට කටයුතු කර තිබීම සම්බන්ධයෙන් ශ්‍රී ලංකා පොදුජන පෙරමුණේ ප්‍රධාන ලේකම් සාගර කාරියවසම් එහිදී විරෝධය පළකර ඇත.

මුලදී ජනාධිපතිවරයාගේ නිල නිවසට ආරාධනා කර තිබූ බැවින්, ශ්‍රී ලංකා පොදුජන පෙරමුණ මෙම රැස්වීමට සහභාගි වූයේ එය සිය පක්ෂය සහ ජනාධිපතිවරයා අතර විශේෂ සාකච්ඡාවක් වනු ඇතැයි යන හැඟීමෙනි.

රැස්වීම ආරම්භයේදීම ජනාධිපති වික්‍රමසිංහ ඉදිරි ජනාධිපතිවරණයට ඉදිරිපත් වීමේ ක්‍රමවේදයන් පිළිබඳ ඉදිරි දර්ශන සහ සිය අභිප්‍රාය ප්‍රකාශ කර ඇත.

කෙසේවෙතත්, ශ්‍රී ලංකා නිදහස් පක්ෂයේ සහ නිමල් ලාන්සා කණ්ඩායමේ ඇතැමුන් ඇතුළු අනෙකුත් පක්ෂ නියෝජිතයන් එහි පැමිණ සිටීමත් සමඟ උණුසුම් තත්ත්වයක් ඇතිවී තිබේ.

වාර්තා වන පරිදි, අනපේක්ෂිත ලෙස අනෙකුත් පක්ෂ නියෝජිතයන් එහි පැමිණීම ගැන කලකිරීම පළකඅ ඇති පොදුජන පෙරමුණේ මහලේකම් කාරියවසම්, ජනාධිපතිවරණ කටයුතු හදිසියේ සාකච්ඡා කිරීමට තම පක්ෂය සූදානම් නැති බව පවසා තිබේ.

ඕනෑම මැතිවරණ සාකච්ඡාවකට පෙර විසඳිය යුතු වෙනත් නිශ්චිත කරුණු ඇති බව ඔහු අවධාරණය කර ඇත.

ශ්‍රී ලංකා නිදහස් පක්ෂය නියෝජනය කරමින් කෘෂිකර්ම ඇමැති මහින්ද අමරවීර පෙන්වාදී ඇත්තේ, කාලය නොමැතිකම හේතුවෙන් මෙවැනි රැස්වීමක් පැවැත්වූ බවයි.

ඊට ප්‍රතිචාර වශයෙන්, ශ්‍රී ලංකා පොදුජන පෙරමුණ අනෙකුත් පක්ෂවලට වඩා වෙනස් ලෙස ක්‍රියාකරන බව අවධාරණය කර ඇති සාගර කාරියවසම්, ජනාධිපතිවරයා සමඟ වෙනම හමුවක් අවශ්‍ය බව අවධාරණය කර තිබේ.

ශ්‍රී ලංකා පොදුජන පෙරමුණ කිසිදු නිශ්චිත අපේක්ෂකයෙකුට සහාය දැක්වීම පිළිබඳව මෙතෙක් තීරණය කර නොමැති බවද ඔහු පැහැදිලි කර ඇත.