April 15, 2025
මීට වසර 14කට පෙර අසාමාන්‍ය ප්‍රතිඥාවක් ලබා දී එම පොරොන්දුව ආරක්ෂා කරමින් කටයුතු කළ ඉන්දියාවේ හර්යානා ප්‍රාන්තයේ කයිතාල් ප්‍රදේශයේ රාම්පාල් කාශ්‍යප් නමැති පුද්ගලයකුට අග්‍රාමාත්‍ය නරේන්ද්‍ර මෝදි හමුවීමට අවස්ථාවක් හිමිව තිබේ.
ඔහු ප්‍රතිඥා දී ඇත්තේ නරේන්ද්‍ර මෝදි අගමැති වනතුරු පාවහන් නොපළඳින බවටයි.
දශකයකට වැඩි කාලයක් පුරා ආරක්ෂා කළ අසාමාන්‍ය ප්‍රතිඥාව, අවසානයේ දෙදෙනා මුණගැසුණු යමුනානගර් ප්‍රසිද්ධ රැස්වීමේදී අවසන් විය.
“ඔහු මීට වසර 14 කට පෙර දිවුරුම් දී තිබුණා, ඔහු පාවහන් පළඳින්නේ මා අගමැති වූ පසුව පමණක් බවත්, ඔහු මාව මුණගැසුණු පසුව පමණක් බවත්,” අගමැතිවරයා එම උත්සවයෙන් පසු x ගිණුමේ පණිවුඩයක් නිකුත් කරමින් සඳහන් කර තිබේ.
“රාම්පාල් ජී වැනි පුද්ගලයන්ගේ සෙනෙහස මම පිළිගනිමි.” යනුවෙන් මෝදි පවසයි.
අගමැති මෝදිගේ නිල x සහ ඉන්ස්ටග්‍රෑම් ගිණුම්වල පළකර ඇති එම හමුවීමේ වීඩියෝ දර්ශනවල, අගමැති විසින් නව සපත්තු යුගලයක් කාශ්‍යප්ට පිරිනමන අයුරු දැක්වේ.
ඔහුට ඒවා පැළඳීමට අග්‍රාමාත්‍යවරයා උපකාර කරන අයුරුද එම වීඩියෝවල දැක්වෙන අතර මිලියන හතකට වඩා පිරිසක් එ‍ය නරඹා ඇත.
