ශ්‍රී ලංකාවේ දුර්වල වූ ආර්ථිකය ශක්තිමත් කිරීම සහ ජාතිවාදය අතුගා දැමීම ජාතික ජන බලවේගයේ ආණ්ඩුවක ප්‍රමුඛතාවය වනු ඇති බව සැප්තැම්බර් 21 ජනාධිපතිවරණයේ ප්‍රධාන තරගකරුවෙක් වන අනුර කුමාර දිසානායක අඟහරුවාදා ප්‍රකාශ කර තිබේ.

ජාතික ජන බලවේග සන්ධානයට නායකත්වය දෙන මාක්ස්වාදී සම්භවයක් ඇති පක්ෂයක් වන ජනතා විමුක්ති පෙරමුණු මූලස්ථානයේදී ඉන්දියාවේ ‘ද හින්දු’ පුවත්පතට සම්මුඛ සාකච්ඡාවක් ලබාදෙමින් ඔහු මේ බව සඳහන් කර ඇත.

ශ්‍රී ලංකාව “පුනරුද ව්‍යාපෘතියක් සඳහා සූදානම්ව සිටී”, යනුවෙන් එහිදී සඳහන් කර ඇති 55 හැවිරිදි අනුර දිසානායක, “ජනතාව වෙනසක් සඳහා ඡන්දය දෙනු ඇත” යනුවෙන් වැඩිදුරටත් පවසා තිබේ.

දූෂණය පිටුදැකීමට ප්‍රතිඥා දීම හැරුණු විට, සජිත් ප්‍රේමදාසගේ ප්සමගි ජන සන්ධානය මෙන්, අන්තර්ජාතික මූල්‍ය අරමුදල (IMF) සමඟ ශ්‍රී ලංකාවේ දැනට ක්‍රියාත්මක වැඩපිළිවෙල පිළිබඳව නැවත සාකච්ඡා කරන බවද අනුර දිසානායක එහිදී පවසා ඇත.

“ඇත්ත වශයෙන්ම, අපගේ සුබසාධන ව්‍යාපෘතිය මගින් රාජ්‍යයට අනෙක් පාර්ශ්වවලට වඩා බෙහෙවින් අඩු වියදමක් දැරීමට සිදුවනු ඇත,” යනුවෙන්ද ඔහු කියාසිටී.