ජාතික ඖෂධ නියාමන අධිකාරියේ රසායනාගාරයේ පුරප්පාඩු 30 ක පමණ හිඟයක් පවතින අතර ඒ ඔස්සේ ආනයනය කරන ලද ඖෂධ පිළිබඳ පරිපූර්ණ තත්ත්ව පරීක්ෂණ පැවැත්වීමේ හැකියාව අඩාල කර ඇති බව The Sunday Morning පුවත්පත අනාවරණ කරයි.

එම පුවත්පත වෙත අදහස් දක්වමින් ජාතික ඖෂධ නියාමන අධිකාරියේ සභාපති වෛද්‍ය ආනන්ද විජේවික්‍රම පවසා ඇත්තේ, ඖෂධවල ගුණාත්මකභාවය තීරණය කිරීම සඳහා රසායනාගාර පරීක්ෂණ පවත්වන අධිකාරියේ ජාතික ඖෂධ තත්ත්ව සහතික කිරීමේ රසායනාගාරයට (NMQAL) 30ක පමණ පිරිසක් හිඟ බවයි.

“ලියාපදිංචි කිරීමේ ක්‍රියාවලිය නිසියාකාරව සිදු නොවීම නිසා ප්‍රධාන වශයෙන් පසුගිය වසර කිහිපය තුළ ප්‍රමිතියෙන් තොර ඖෂධ පිළිබඳ ගැටළුව ඇති වූ නමුත් ඒ සමඟම අපට ගුණාත්මක බව පරීක්ෂා කිරීමටද සිදු විය,” ඔහු පැවසීය.

“කාර්ය මණ්ඩලයේ හිඟකම නිසා මෙය සිදුවිය යුතු ප්‍රමාණයට සිදු නොවීය. අපි තවමත් මෙම ප්‍රශ්නයට මුහුණ දී සිටින නිසා අපට අවශ්‍ය ප්‍රමාණයට පරීක්ෂණ පැවැත්විය නොහැක.” විශේෂඥ වෛද්‍ය ආනන්ද විජේවික්‍රම පැවසීය.

ඒ අනුව ගුණාත්මක බව තහවුරු කිරීම සඳහා ජාතික ඖෂධ නියාමන අධිකාරිය මීට සති හතරකට පමණ පෙර විශ්වවිද්‍යාල රසායනාගාරවල සාම්පල පරීක්ෂා කිරීම ආරම්භ කළ බව ද ඔහු පවසා තිබේ.

පසුගිය වසරේ ශ්‍රී ලංකා වෛද්‍ය සංගමය විසින් (SLMA) ජ්‍යෙෂ්ඨ ඖෂධවේදීන්ගේ හිඟය ඇතුළු කරුණු ගණනාවක් සම්බන්ධයෙන්ජාතික ඖෂධ නියාමන අධිකාරිය විවේචනය කළ අතර, මෙය ඖෂධවල තත්ත්ව පරීක්ෂාවට බලපෑ හැකි බවට ද අනතුරු ඇඟවීය.