විදේශිකයන් විසින් මෙරට සිදුකරන විවිධ වංචාවන් පිටුදැකීම පොලිසිය ඇතුළු අදාළ ආයතනවලට පමණක් කළ හැකි දෙයක් නොවන බවත් විදේශිකයන්ට දේපළ කුලියට දෙන අය විශේෂයෙන්ම අවධානයෙන් සහ විමසිල්ලෙන් සිටීම වැදගත් බවත් පොලිසිය අවධාරණය කරයි.

මෙරට රැඳී සිටිමින් අන්තර්ජාල වේදිකා හරහා විවිධ වංචාවන් සිදු කළ බවට සැක කෙරෙන විදේශීය ජාතිකයන් පිරිසක් අපරාධ පරීක්ෂණ දෙපාර්තමේන්තුව (CID) විසින් සිදු කරන ලද විමර්ශනවල ප්‍රතිඵලයක් ලෙස පසුගිය මාස කිහිපය තුළ අත්අඩංගුවට ගෙන ඇත.

විදේශීය ජාතිකයන් විසින් සිදුකරන වංචාවන් ලොව සෑම තැනකම බහුලව පවතින බව සඳහන් කරන පොලිස් මාධ්‍ය ප්‍රකාශක නියෝජ්‍ය පොලිස්පති නිහාල් තල්දූව, එවැනි සිදුවීම් තුරන් කිරීම පොලිසිය මගින් පමණක් සිදුකිරීම ප්‍රායෝගික නොවන බවද පවසයි.

“මෙය පොලිසියට හෝ අපරාධ පරීක්ෂණ දෙපාර්තමේන්තුවට පමණක් කළ හැකි දෙයක් නෙවෙයි. මහජනතාව විමසිලිමත් විය යුතුයි. නිදසුනක් වශයෙන්, නිවසක් හෝ දේපළක් කුලියට දීමේදී, කුලී නිවැසියන් විසින් එය භාවිත කරන ආකාරය ගැන අයිතිකරුවන් අවධානය යොමු කළ යුතුයි. මෙවැනි පිරිස් නිතර නිතර නිතර පොලිසියෙන් සහ අපරාධ පරීක්ෂණ දෙපාර්තමේන්තුවෙන් අත්අඩංගුවට ගත්තත්, කුලීකරුගේ අරමුණ ගැන කිසිම ප්‍රශ්නයක් අහන්නේ නැතිව මිනිස්සු තවමත් ඉහළ මිලක් දෙන බවට පොරොන්දු වූ විට ඔවුන්ගේ දේපළ මෙවැනි අයට කුලියට දෙනවා. ” යනුවෙන් ඔහු සඳහන් කරයි.

පසුගිය මාස කිහිපය තුළ අපරාධ පරීක්ෂණ දෙපාර්තමේන්තුව ස්ථාන කිහිපයකදී සිදුකළ වැටලීම්වලින් අනතුරුව ඉන්දීය සහ චීන ජාතිකයන් ඇතුළු විදේශීය ජාතිකයන් විශාල පිරිසක් අත්අඩංගුවට ගෙන තිබිණි.

මෙම මෙහෙයුම්වලදී සැකකරුවන් සතුව තිබී ජංගම දුරකථන, ලැප්ටොප් පරිගණක, ඩෙස්ක්ටොප් පරිගණක සහ තවත් උපකරණ රැසක් ද ඔවුන් භාරයට ගෙන තිබේ.

අත්අඩංගුවට ගත් සැකකරුවන්ට සාමාන්‍යයෙන් 2007 අංක 7 දරන පරිගණක අපරාධ පනත, 2006 අංක 31 දරන සංක්‍රමණ හා විගමන (සංශෝධන) පනත සහ 2006 අංක 5 දරන මුදල් විශුද්ධිකරණය වැළැක්වීමේ පනතේ බහුවිධ නීතිමය ප්‍රතිපාදන යටතේ චෝදනා එල්ල වේ.