අන්තර්ජාතික මූල්‍ය අරමුදලේ (IMF) අමෙරිකානු ඩොලර් මිලියන 337ක් වන තුන්වැනි වාරිකය නිකුත් කිරීමට පෙර පනවන ලෙස අවධාරණය කර තිබෙන අපරාධවලින් ලැබෙන ආදායම රාජසන්තක කිරීමට ඉඩ සලසන නීති කෙටුම්පත ජනාධිපති රනිල් වික්‍රමසිංහ සහ අධිකරණ ඇමැති විජයදාස රාජපක්ෂ විසින් කැබිනට් මණ්ඩලයට ඉදිරිපත් කර තිබේ.

මෙම කෙටුම්පත ‘අපරාධවලින් ලැබෙන ආදායම රාජසන්තක කිරීම පිළිබඳ යෝජිත නීතියේ ප්‍රතිපත්ති සහ නෛතික රාමුව සහ කෙටුම්පත් විධිවිධාන සංවර්ධනය කිරීම සඳහා වූ කමිටුව’ විසින් සකසන ලද විස්තීර්ණ වාර්තාවක කොටසකි.

එම කමිටුව පත්කර ඇත්තේ අධිකරණ අමාත්‍යාංශය විසිනි.

වාර්තාවේ විධායක සාරාංශයක්, යෝජිත නීතිය සඳහා යෝජනා ක්‍රමයක් සහ කෙටුම්පතක් ඉදිරිපත් කර ඇත.

සම්පූර්ණ ලේඛනය කැබිනට් මණ්ඩලය සතුව පවතින බව අධිකරණ ඇමැති විජයදාස රාජපක්ෂ මහතා පවසයි.

අපරාධ ආදායම් පනත මගින් අපරාධවලින් ලැබෙන ආදායම සීමා කිරීම, සංරක්ෂණය කිරීම, පවරා ගැනීම, ආරක්ෂාව, කළමනාකරණය සහ රාජසන්තක කිරීම සඳහා පහසුකම් සපයයි.

අපරාධයෙන් ලැබෙන ආදායම වරදකරු වීමෙන් පසු රාජසන්තක කිරීම සහ අපරාධයේ ආදායම වරදකරු නොවන පදනම මත රාජසන්තක කිරීම සඳහා ද එමගින් පහසුකම් සපයයි.

ආරක්ෂාව, කළමනාකරණය සහ සංරක්ෂණය සඳහා නියෝජිතායතනයක් නිර්මාණය කිරීමට ද යෝජිත අතර එය අපරාධ කළමනාකරණ අධිකාරිය ලෙස හැඳින්වේ.

අපරාධවලට ගොදුරු වූවන්ට අලාභහානි ලබා ගැනීමට ඉඩ සලසන සිවිල් පිළියම් ද මෙම පෙරළිකාර නීතිය මගින් යෝජනා කරයි.

“උදාහරණයක් විදියට අපි හිතමු මංතීරු තුනක් තියෙන්න ඕන අධිවේගී මාර්ගයක දාලා තියෙන්නේතියෙන්නේ දෙකක් විතරයි කියලා. සමාජයට එම ප්‍රතිලාභය අහිමි කර ඇති නිසා ඔවුන්ට ‘කණ්ඩායම් ක්‍රියා’ ලෙස හැඳින්වෙන කොටසින් ඊට එරහිව ඉදිරිපත් වෙන්න පුළුවන්. හානි සහ වන්දි සඳහා මෙම නීතිය යටතේ සිවිල් පිළියම් අපි හඳුනාගෙන තිබෙනවා,” යැයි ශ්‍රේෂ්ඨාධිකරණ විනිසුරු යසන්ත කෝදාගොඩ ප්‍රමුඛ 17 දෙනෙකුගෙන් යුත් කමිටුවේ සිටි ජනාධිපති නීතිඥ කුවේර ද සොයිසා පවසයි.

මංකොල්ලකෑම, අල්ලස් දීම, කොමිස් හෝ වෙනත් ආකාරයකින් උපයා ගන්නා දේපළ රාජසන්තක කිරීමට ශ්‍රී ලංකාවට නීතියක් නොමැති බවත්, එය නිවැරදි කිරීම යෝජිත නීතියේ අරමුණ බවත් ඇමැති රාජපක්ෂ පෙන්වා දෙයි.

කෙසේවෙතත්, සමතුලිතතාවයක් ඇති කර ගැනීමට සහ නීතිය අවභාවිතය වැළැක්වීමට, උදාහරණයක් ලෙස, දේශපාලන අරමුණු සාක්ෂාත් කර ගැනීම සඳහා මෙන්ම මානව හිමිකම් සුරැකීමට ද මෙහිදී බොහෝ සැළකිල්ලක් දක්වා ඇත.

මෙම නීතිය එක්සත් රාජධානියේ අපරාධ ආදායම් පනතේ අඩංගු මූලධර්ම මත පදනම් වන නමුත් එය ස්වදේශීය කෙටුම්පතක් බව කුවේර ද සොයිසා පැවසීය.

නීතිගත කළ පසු එය අල්ලස් හා දූෂණයෙන් ලැබෙන ආදායමට මෙන්ම මත්ද්‍රව්‍ය ජාවාරම වැනි අතිවිශාල ආදායමක් උපයන වෙනත් අපරාධවලින් ලැබෙන ආදායමටද අදාළ විය හැකිය.

අපරාධවලින් ලැබෙන ආදායම , සොයාගත නොහැකි සහ ලබා ගත නොහැකි අපරාධවලින් ලැබෙන ආදායමේ වටිනාකමට දඬුවමක් නියම කිරීමට ද මෙම නීතිය අධිකරණයට බලය දෙයි.