පාර්ලිමේන්තු මන්ත්‍රීවරුන්ට ඇති වරප්‍රසාද සහ නිල නිවාස ලබාදීම සම්බන්ධයෙන් වන ක්‍රියාවලිය හා හා ප්‍රතිපත්ති පිළිබඳව පාර්ලිමේන්තු මහලේකම් කුෂානි රෝහණදීර පැහැදිලි කර ඇත.

අද (29) ජනමාධ්‍ය වෙත අදහස් දක්වමින් ඇය කියාසිටියේ, පාර්ලිමේන්තු සංකීර්ණයේ සිට කිලෝමීටර් 40 කට වැඩි දුරින් සිටින මන්ත්‍රීවරුන්ට මාදිවෙල නිවාස සංකීර්ණයේ නිල නිවාස ඉල්ලීමට සුදුසුකම් ඇති බවයි. මේ වන විට මන්ත්‍රීවරුන් 35 දෙනෙකු එවැනි ඉල්ලීම් ඉදිරිපත් කර ඇත.

“හිටපු මන්ත්‍රීවරුන් විසින් මීට පෙර ආපසු ලබාදුන් නිවාස 25ක් 30ක් පමණ අලුතින් තේරී පත් වූ පාර්ලිමේන්තු මන්ත්‍රීවරුන්ට නවාතැන් ගැනීමට ප්‍රතිසංස්කරණය කරමින් පවතිනවා. ප්‍රතිසංස්කරණ කටයුතු අවසන් වූ පසු ප්‍රමුඛතාවය මත මෙම නිවාස ලබා දෙනවා” ඇය පෙන්වා දුන්නාය.

මාදිවෙල නිවාස සංකීර්ණයේ ඇති නිල නිවාස 108 න් 80 ක් ආණ්ඩු පක්ෂයේ මන්ත්‍රීවරුන් සඳහා වෙන්කර ඇති අතර 28ක් විපක්ෂයේ මන්ත්‍රීවරුන් සඳහා වෙන් කර ඇත. මෙම විධිවිධානය පාර්ලිමේන්තු නියෝජනය මත පදනම්ව නිවාස සාධාරණ ලෙස බෙදාහැරීම සහතික කරයි.

නවක මන්ත්‍රීවරුන්ගේ වරප්‍රසාද කප්පාදු කර ඇත්ද යන්න පිළිබඳව කළ විමසීමකට පිළිතුරු දෙමින් ඇය කියාසිටියේ තමා දන්නා පරිදි මන්ත්‍රීවරුන්ට දැනට ලබා දී ඇති වරප්‍රසාදවල සැළකිය යුතු වෙනසක් සිදුනොවන බවයි.