February 4, 2025
උතුරු මැද පළාතේ පාසල්වල 11 ශ්‍රේණියේ සිංහල සහ බුද්ධාගම විෂයයන් සඳහා අවසාන වාර විභාග ප්‍රශ්න පත්‍ර පිටතට ලබාදීම සම්බන්ධයෙන් චෝදනා ලැබ සිටින අනුරාධපුර දිස්ත්‍රික්කයේ පාසලක වැඩබලන විදුහල්පතිවරයකු පෙබරවාරි 07 වැනි දින දක්වා රක්ෂිත බන්ධනාගාර ගත කර ඇත.
විත්තිකරු අද (04) අධිකරණයට ඉදිරිපත් කිරීමෙන් පසු අනුරාධපුර ප්‍රධාන මහේස්ත්‍රාත් නාලක සංජීව ජයසූරිය විසින් මෙම නියෝගය නිකුත් කර තිබේ.
මුද්‍රා තැබූ විභාග ප්‍රශ්න පත්‍ර හිතාමතාම තඹුත්ගම ප්‍රදේශයේ උපකාරක පන්ති ගුරුවරයෙකුට WhatsApp හරහා යැවීමෙන් රජයට රුපියල් මිලියන 11.5 කට වඩා මූල්‍යමය අලාභයක් සිදුකිරීමේ චෝදනාව මත සැකකරු අත්අඩංගුවට ගෙන අධිකරණයට ඉදිරිපත් කරන ලදී.
අනුරාධපුර කොට්ඨාශ අපරාධ ඒකකයට අනුව, මූලික විමර්ශනවලින් හෙළි වී ඇත්තේ, සැකකරු තම පාසලේ විභාග ප්‍රශ්න පත්‍ර පාර්සල්වල මුද්‍රා කඩා, ගුරුවරයෙකුගේ ජංගම දුරකථනයක් භාවිතා කර ඡායාරූප ගෙන, අදාළ උපකාරක පන්ති ගුරුවරයාට යවා ඇති බවයි.
ඊට අමතරව, සැකකරු තවත් විභාග ප්‍රශ්න පත්‍රයක් නිවසට ගෙන ගොස්, තම දියණියගේ ජංගම දුරකථනය භාවිතයෙන් එය ඡායාරූපගත කර, WhatsApp හරහා එම පින්තූර ප්‍රශ්න පත්‍රය බෙදාහැර ඇති බව කියනු ලැබේ.
වාර්තා වන පරිදි, ඔහු ලිපි ලේඛන ලබාගැනීමෙන් පසු ඉතා සූක්ෂම ලෙස පාර්සල් නැවත මුද්‍රා තැබූ බව පොලිසිය අධිකරණයට වාර්තා කර ඇත.
එම ක්‍රියාවේ ප්‍රතිඵලයක් ලෙස, අධ්‍යාපන බලධාරීන්ට මුළු පළාතටම බලපෑ විභාග ප්‍රශ්න පත්‍ර අත්හිටුවීමට සිදු වූ අතර, එමඟින් සැලකිය යුතු මූල්‍ය අලාභයක් සිදුවිය.
මෙම නීතිවිරෝධී ක්‍රියාවට සම්බන්ධ වෙනත් පුද්ගලයන් පිළිබඳව විමර්ශන දිගටම සිදුවන බැවින් තවදුරටත් අත්අඩංගුවට ගැනීම් අපේක්ෂා කරන බව පොලිසිය පවසයි.
සැකකරුට පොදු දේපළ පනත යටතේ චෝදනා එල්ල වී ඇති අතර, අනුරාධපුර පොලිසිය සිද්ධියට සම්බන්ධ අනෙකුත් සැකකරුවන් අත්අඩංගුවට ගැනීමට විමර්ශන පත්වවමින් සිටී.
42.31%
17.27%
32.76%
