March 24, 2024
රජයේ ඉහළ පෙළේ විදේශ සංචාර දෙකක් ලබන සතියේ සිදු වීමට නියමිතව තිබේ.
ඒ අනුව අගමැති දිනේෂ් ගුණවර්ධන චීනයේ සංචාරයක නිරතවීමට නියමිත අතර ජනාධිපති කාර්ය මණ්ඩල ප්‍රධානී සහ ජාතික ආරක්ෂක උපදේශක සාගල රත්නායක ඉන්දියාවේ සංචාරයක නිරතවීමට නියමිතය.
මුදල් රාජ්‍ය ඇමැති ෂෙහාන් සේමසිංහ සහ අගමැති ලේකම් අනුර දිසානායක සමග අගමැතිවරයාගේ චීන සංචාරය මාර්තු මස 25-29 දක්වා සිදුකිරීමට නියමිතය.
අගමැති දිනේෂ් ගුණවර්ධන මෙම සංචාරයේ දී චීන ජනාධිපති ෂී ජින්පින්ග්, අගමැති ලී චියැන්ග් සහ චීන කොමියුනිස්ට් පක්ෂයේ තුන්වැනි ඉහළම සාමාජිකයා සමඟ සාකච්ඡා පවත්වනු ඇත.
ඔහු දකුණු චීනයේ හයිනාන් ප්‍රාන්තයේ බෝආඕ හි පැවැත්වෙන බෝආඕ වාර්ෂික ආසියානු සමුළුවේ ප්‍රධාන ආරාධිතයා ලෙසද සහභාගි වීමට නියමිතය.
අන්තර්ජාතික ප්‍රජාව අභියෝගවලට සහ වගකීමෙන් කටයුතු කිරීමට එක්ව කටයුතු කරන්නේ කෙසේද යන්න පිළිබඳ මෙහිදී අවධානය යොමු කෙරෙන බව සංවිධායකයන් නිකුත් කළ නිවේදනයක දැක්වේ.
ඒ සඳහා ජාතික නායකයන්, රාජ්‍ය නිලධාරීන්, අන්තර්ජාතික සංවිධාන ප්‍රධානීන්, ව්‍යාපාරිකයන්, විවිධ ක්ෂේත්‍රවල ප්‍රවීණයන් සහ මාධ්‍යවේදීන්ට ආරාධනා කර ඇති බව නිවේදනයේ සඳහන් වේ.
ගෝලීය ආර්ථිකය, සමාජ සංවර්ධනය, අන්තර්ජාතික සහයෝගීතාව සහ විද්‍යාත්මක හා තාක්‍ෂණික නවෝත්පාදන පිළිබඳ කමිටු සාකච්ඡා පැවැත්වෙනු ඇත.
මේ අතර මාර්තු 27 වැනිදා සිට 28 වැනිදා දක්වා සංචාරයක් වෙනුවෙන් සාගල රත්නායකගේ නායකත්වයෙන් යුත් දූත පිරිස නවදිල්ලි නුවරට පැමිණීමට නියමිතය.
මෙම නියෝජිත පිරිසට ප්‍රවාහන හා පරිසර අමාත්‍යංශ ලේකම්වරුන්, දුම්රිය සාමාන්‍යාධිකාරී, රේගු අධ්‍යක්ෂ ජනරාල් සහ මාණ්ඩලික ප්‍රධානී කාර්යාලයේ අධ්‍යක්ෂ ජනරාල්වරයා ඇතුළත් වේ.
නිල ආරංචි මාර්ග පැවසුවේ මෙම සංචාරයේ අරමුණ “ඉඩම් සම්බන්ධතාව පිළිබඳ සාකච්ඡාව ආරම්භ කිරීම” බවයි.
එහෙත් ඉන්දියාවේදී ඔවුන් හමුවන්නේ කවුරුන්ද යන්න පිළිබඳ වැඩිදුර තොරතුරු හෙළිකර නැත.
පසුගිය වසරේ ජූලි මාසයේදී ජනාධිපති රනිල් වික්‍රමසිංහගේ නවදිල්ලි සංචාරයේදී අගමැති නරේන්ද්‍ර මෝදි සමඟ පැවති සාකච්ඡාවකින් පසුව නිකුත් කළ ඒකාබද්ධ ප්‍රකාශයේ නායකයන් දෙපළ කරුණු කිහිපයකට එකඟ වූහ.
ත්‍රිකුණාමල වරායට ගොඩබිම් ප්‍රවේශය සංවර්ධනය කිරීම සඳහා ශ්‍රී ලංකාව සහ ඉන්දියාව අතර ගොඩබිම් සම්බන්ධතාවක් ඇති කිරීමට සහ දෙරට අතර සහස්‍ර ගණනාවක් පැරණි සබඳතාව තවදුරටත් තහවුරු කරමින් ශ්‍රී ලංකාව සහ ඉන්දියාව යන දෙරටේම ආර්ථික වර්ධනයට සහ සමෘද්ධිය ඇති කිරීමට කටයුතු කිරීමට නායකයන් දෙපළ එකඟ වී තිබිණි.
ඒ සඳහා වන ශක්‍යතා අධ්‍යයනයක් ඉකඩිනමින් පැවැත්වීමට ද එකඟ වී තිබිණි.
ශ්‍රී ලංකාවට දැරිය හැකි සහ විශ්වාසදායක බලශක්ති සම්පත් සැපයීම සහතික කිරීමේ අරමුණින් ඉන්දියාවේ දකුණු ප්‍රදේශයේ සිට ශ්‍රී ලංකාව දක්වා බහු නිෂ්පාදන ඛනිජ තෙල් නල මාර්ගයක් ඉදිකිරීමට දෙරට සහයෝගයෙන් කටයුතු කරන බව ද ඒකාබද්ධ ප්‍රකාශයේ සඳහන් විය.
උතුරේ පුනර්ජනනීය බලශක්ති ව්‍යාපෘති සඳහා ඉන්දියාව දැනටමත් මනාප ලබා ගනිමින් සිටී.
මෙම නියෝජිත පිරිස විදුලිබල හා බලශක්ති අමාත්‍යංශය විසින් ඉදිරිපත් කරන ලද වාර්තාවක් ද රැගෙන යන බව වැඩිදුරටත් වාර්තා වේ.
