2008 සිට 2024 දක්වා කාලය තුළ ජනාධිපති අරමුදලින් මුදල් අවභාවිත කළ බවට චෝදනා එල්ල වී ඇති හිටපු අමාත්‍යවරුන් සහ පාර්ලිමේන්තු මන්ත්‍රීවරුන් 22 දෙනකු සම්බන්ධයෙන් අපරාධ පරීක්ෂණ දෙපාර්තමේන්තුවේ (CID) මූල්‍ය හා වාණිජ අපරාධ විමර්ශන අංශය පරීක්ෂණ ආරම්භ කර තිබේ.

පරීක්ෂණයේ කොටසක් ලෙස ජනාධිපති අරමුදලෙන් අරමුදල් බෙදාහැරීමට අදාළ ලිපිගොනු 22ක් විමර්ශන නිලධාරීන් විසින් ලබාගෙන ඇති බව පොලිසිය පවසයි.

ප්‍රශ්නගත පුද්ගලයන් විසින් රුපියල් බිලියනයකට වඩා වැඩි මුදලක් විවිධ ප්‍රමාණවලින් ලබාගෙන ඇති බව මූලික සොයාගැනීම්වලින් හෙළි වී තිබේ.

මෙම අරමුදල් ලබාගැනීමේ ක්‍රියාවලියේදී කිසියම් අක්‍රමිකතාවයක් සිදුවී ඇත්දැයි සොයාබැලීම සඳහා දැනට පරීක්ෂණ සිදුවෙමින් පවතී.

ඒ අනුව, විමර්ශනයේ කොටසක් ලෙස ජනාධිපති අරමුදල් ගිණුමෙන් නිකුත් කරන ලද චෙක්පත් පිළිබඳ විස්තර ලබා ගැනීම සඳහා CID නිලධාරීන් ඊයේ (අප්‍රේල් 2) කොළඹ කොටුව මහේස්ත්‍රාත් අධිකරණයෙන් නියෝගයක් ඉල්ලා තිබේ.