ලෝකයේ අති නවීනම තාක්ෂණය සහිත අඹේවෙල කිරි ගොවිපොළ සමූහයේ සංවර්ධන කටයුතු පිළිබඳ සොයා බැලීමට ජනාධිපති රනිල් වික්‍රමසිංහ ඊයේ (20) පෙරවරුවේ එහි නිරීක්ෂණ චාරිකාවක නිරත විය.

ජනාධිපතිවරයා 2022 වසරේ දෙසැම්බර් මාසයේදී ද අඹේවෙල කිරි ගොවිපොළේ හදිසි ‍නිරික්ෂණ චාරිකාවකට එක්වූ අතර එහිදී ලබාදුන් උපදෙස් අනුව ගොවිපොළ තුළ පුළුල් සංවර්ධන ක්‍රියාවලියක් පසුගිය වසරේදී ආරම්භ කෙරිණි.

ඊයේ පෙරවරුවේ අඹේවෙල කිරි ගොවිපොළ වෙත පැමිණි ජනාධිපතිවරයාව කිරි ගොවිපොළ සමූහයේ සාමාන්‍යාධිකාරී සරත් බණ්ඩාර මහතා ඇතුළු කාර්ය මණ්ඩලය විසින් පිළිගනු ලැබීය.

ගොවිපොළේ නව සංවර්ධන කටයුතුවල ප්‍රගතිය විමසා බැලූ ජනාධිපතිවරයා කිරි ගවයන් රඳවා සිටින පරිශ්‍රය ද නිරික්ෂණ කළේය.

අනතුරුව එහි විධායක කාර්ය මණ්ඩලය සමඟ කෙටි සාකච්ඡාවකට ද එක්වූ ජනාධිපතිවරයා අඹේවෙල ගොවිපොළ කිරි නිෂ්පාදන ක්ෂේත්‍රයේ ලබා ඇති ක්‍රමික වර්ධනය හා එමගින් ජාතික ආර්ථිකයට ලබා දෙන දායකත්වය ඇගයීමට ලක්කළේය.

එමෙන්ම ගොවිපොළ නැරඹීමට පැමිණෙන සංචාරකයන් වෙනුවෙන් විවිධ සංචාරක ප්‍රවර්ධන වැඩසටහන් ක්‍රියාවට නැංවීමේ අවශ්‍යතාවය ද පෙන්වා දුන්නේය.

එම කාර්යාල පරිශ්‍රයේ තැන්පත් කර ඇති විශේෂ අමුත්තන්ගේ පොතේ සටහනක් ද තැබූ රනිල් වික්‍රමසිංහ ජනාධිපතිවරයා කාර්ය මණ්ඩලය සමඟ සමූහ ඡායාරූපයකට ද එක් විය.

මේ අතර සති අන්තයේ ගොවිපොළ නැරඹීමට පැමිණ සිටි දෙස් විදෙස් සංචාරකයන් අතරට ගිය ජනාධිපතිවරයා ඔවුන්ගේ ද තොරතුරු විමසමින් සුහද කථා බහක නිරත විය.

1940 දශකයේදි ආරම්භ කෙරුණු අඹේවෙල ගොවිපොළ 2001 වසරේ පෞද්ගලීකරණයට ලක් කෙරුණු අතර ඉන්පසු සිදුකෙරුණු පුළුල් නවීකරණය හේතුවෙන් මේ වන විට එය කිරි නිෂ්පාදන සහ ගොවිපොළ තාක්ෂණයේ ඉහළම තාක්ෂණික භාවිතයක් සහිත ලංකාවේ සහ දකුණු ආසියාවේ ප්‍රධානතම මධ්‍යස්ථානය බවට පත්ව ඇති බව අඹේවෙල ගොවිපොළ සමූහයේ සාමාන්‍යාධිකාරී සරත් බණ්ඩාර මෙහිදී සඳහන් කළේය.

ගොවිපොළේ සංවර්ධන කටයුතු වෙනුවෙන් ජනාධිපතිවරයා අග්‍රාමාත්‍ය ධුරය දැරූ සමයේ සිටම ලබාදුන් සහාය මෙහිදී අගය කළ ඔහු නිරතුරුවම ගොවිපොළේ කටයුතු සොයා බැලීමට පැමිණීම පිළිබඳවද ජනාධිපතිවරයාට ස්තූතිය පිරිනැමීය.

2022 දෙසැම්බර් මස ජනාධිපතිවරයා ගොවිපොළ වෙත පැමිණෙන විට එහි දෛනික කිරි නිෂ්පාදනය දිනකට ලීටර් 40,000ක් පමණ වූ බවත්, පසුව ක්‍රියාත්මක කළ නවීකරණ වැඩපිළිවෙළ හේතුවෙන් මේ වසර වන විට කිරි ලීටර් 52,000ක දෛනික නිෂ්පාදනයක් සිදු කෙරෙන බවත් එය 30%ක වර්ධනයක් බවත් සරත් බණ්ඩාර පෙන්වා දී තිබේ.

ක්‍රමානුකූලව කිරි නිෂ්පාදන ධාරිතාව ඉහළ නංවා ගනිමින් වසරකට කිරි ලීටර් මිලියන 20ක් නිෂ්පාදනය කිරීමට ගොවිපොළ සමූහය කටයුතු කරමින් සිටින බවද ඔහු පෙන්වා දුන්නේය.

කිරි ගවයන් සඳහා වන ඉහළ ප්‍රමිතියෙන් යුත් ගුණාත්මක ප්‍රභේද මෙරටදීම නිර්මාණය කිරීමට අඹේවෙල සමූහය මේ වන විට සමත්ව ඇති අතර එම කිරි ගවයන් නඩත්තු කිරීම, අවශ්‍ය ආහාර පාන ලබා දීම, බර කිරීම, රෝගී තත්ත්වයන් හඳුනා ගැනීම සහ එවා හඳුනා ගැනීමකදී ගවයින් වෙන් කිරීම ආදී සියලු කටයුතු ස්වයංක්‍රීය ක්‍රමවේදයකට අනුව යාන්ත්‍රානුසාරයෙන් සිදු කෙරේ.

එසේම පසුගිය සංචාරයේ දී ජනාධිපතිවරයා ලබා දුන් උපදෙස් පරිදි මෙරට විශ්වවිද්‍යාල සිසුන්ගේ පර්යේෂණ කටයුතු සහ අත්දැකීම් සඳහා මේ වන විට ගොවිපොළ විවෘත කර ඇති බවත්, තවත් එක් ගොවිපොළක් ආදර්ශ ගොවිපොළක් ලෙස මහජනතාවට විවෘත කර ඇති අතර ගොවි ජනතාව, ගොවි සංගම් නියෝජිතයන් ඇතුළු ඕනැම අයකුට එහි පැමිණ ආදර්ශ ගොවිපොළක අත්දැකීම් ලබාගත හැකි බවත් සරත් බණ්ඩාර පැවසීය.

ජනාධිපතිවරයාගේ නිවැරදි ආර්ථික වැඩපිළිවෙළ සමඟ මේ වන විට රට තුළ ඇතිව තිබෙන ආර්ථක ස්ථාවරත්වය නිසා සංචාරකයන්ගේ පැමිණීමද ඉහළ ගොස් ඇති බවත්, දෙස් විදෙස් සංචාරකයන් විශාල පිරිසක් දෛනිකව අඹේවෙල කිරි ගොවිපොළ නැරඹීමට පැමිණෙන බවත් පෙන්වා දුන් සරත් බණ්ඩාර වසර කිහිපයකට පසුව එක් දිනක සංචාරකයන් වැඩිම පිරිසකගේ පැමිණීම වන සංචාරකයන් 9,000කගේ පැමිණීම මෙම වසරේ දිනක සනිටුහන් කෙරුණු බවත් සඳහන් කළේය.

ගොවිපොළ වෙත පැමිණෙන දෙස් විදෙස් සංචාරකයන් වෙනුවෙන් විශේෂ වැඩසටහනක් මෙම වසරේදී ක්‍රියාවට නංවා තිබෙන බවත් ඔවුන්ගේ පහසුකම් ඉහළ නැංවීමට පියවර ගෙන ඇති බවත් සරත් බණ්ඩාර වැඩිදුරටත් පැවසීය.