මෙරට දීර්ඝ කාලීනව ජීවත් වන රුසියානු සහ යුක්රේන සංචාරකයන්ට දින 14ක කාලයක් ඇතුළත රට හැරයෑම සඳහා ආගමන හා විගමන දෙපාර්තමේන්තුව විසින් කළ දැනුම්දීම සම්බන්ධයෙන් වහාම පරීක්ෂණයක් පවත්වන ලෙස ජනාධිපති රනිල් වික්‍රමසිංහ නියෝග කර තිබිණි.

ඒ අනුව, කොළඹ රුසියානු තානාපති කාර්යාලය ප්‍රකාශ කර ඇත්තේ, ශ්‍රී ලංකා ජනාධිපතිවරයාගේ මෙහෙයවීමෙන් සිදුකරන එම විමර්ශනවල ප්‍රතිඵල බලාපොරොත්තුවෙන් සිටින බවයි.

තානාපති කාර්යාලය, මීට පෙර නිකුත් කළ මාධ්‍ය නිවේදනයක සඳහන් කළේ, සංචාරක කටයුතු සඳහා ශ්‍රී ලංකාවේ රැඳී සිටින හෝ ස්ථිරව පදිංචිව සිටින සිය පුරවැසියන්ගෙන් ශ්‍රී ලංකා නීති සහ සිරිත් විරිත් දැඩි ලෙස පිළිපදින ලෙස තමන් ඉල්ලා සිටින බවයි.

යුද්ධය දරුණු වීමෙන් පසු තම මව් රටවලට ගුවන් ගමන් ඇණහිටීමෙන් පීඩාවට පත් වූ යුක්රේන ජාතිකයන්ට සහ රුසියානුවන්ට 2022 පෙබරවාරි 28 වැනිදා සිට සම්පූර්ණ වසර දෙකක කාලයක් ශ්‍රී ලංකාවේ රැඳී සිටීමට අවසර ලබා දී ඇත්තේ නොමිලේ වීසා දීර්ඝ කිරීම් සහ කල් ඉකුත් වූ සංචාරක වීසා සඳහා දඬුවම් පැනවීමක් නොමැතිව බව ආගමන හා විගමන දෙපාර්තමේන්තු ලිපියේ සඳහන් වේ.

රුසියානු යුක්රේන ගැටුම දිගින් දිගටම පැවතිය ද දැන් රුසියාව සහ ශ්‍රී ලංකාව අතර සෘජු ගුවන් ගමන් පවතින අතර යුක්රේන ජාතිකයන්ට ද ගුවන් මගින් ශ්‍රී ලංකාවට ඇතුළුවීමට සහ පිටවීමට පහසුකම් ඇති බව ද එම ලිපියේ සඳහන් වේ.