වසර ගණනාවක් අධිකරණ ක්‍රියාමාර්ගවලින් වෙහෙසට පත් නොවී බදු වංචාකරුවන්ගෙන් නොගෙවූ බදු කඩිනමින් අයකර ගැනීම සඳහා විශේෂ බදු අධිකරණයක් පිහිටුවීමේ යෝජනාව ජනාධිපති රනිල් වික්‍රමසිංහ විසින් සළකා බැලීමට නියමිතය.

“මේ වන විට බදු ගෙවීම පැහැර හැර ඇති පුද්ගලයන්ගෙන් බදු අයකර ගැනීමට සැලසුම් සකස්කර තිබෙනවා. අපේ රටේ තිබෙන්නේ සම්පූර්ණයෙන්ම ස්වේච්ඡාවෙන් බදු ගෙවන ව්‍යුහයක්. උදාහරණයක් ලෙස, අපිට යමෙකුගේ ඉපැයීම් ගැන විමසන්න පුළුවන්. බදු එකතු කිරීමේ ක්‍රියාවලිය ආරම්භ වන්නේ එතැනිනි. සමහරු බදු අයකරගන්න උසාවි යනවා. ඊට පස්සේ අවුරුදු ගාණක් උසාවියේ නඩු තියෙනවා. බොහෝ නඩු නොවිසඳී පවතිනවා. බදු අයකිරීමේ ක්‍රියාවලියේ ප්‍රායෝගික ගැටලු රැසක් පවතිනවා.” යැයි මුදල් රාජ්‍ය ඇමැති රංජිත් සියඹලාපිටිය පවසයි.

ඒ අනුව බදු එකතු කිරීමේ ප්‍රායෝගික අභියෝගවලට විසඳුම් සෙවීම සඳහා විශේෂ බදු අධිකරණයක් පිහිටුවීමට ජනාධිපතිවරයාගේ අනුමැතිය සඳහා යෝජනාවක් ඉදිරිපත් කර ඇති බව ඇමැතිවරයා සඳහන් කරයි.

මේ අතර සුරාබදු සියයට 20 කින් වැඩි කිරීමෙන් පසු ඇතැම් මත්පැන් නිෂ්පාදන සමාගම් සුරාබදු ගෙවීම පැහැර හැර ඇති බව සියඹලාපිටිය අනාවරණය කළේය. එබැවින් දින 14ක් ඇතුළත නොගෙවූ බදු ගෙවීම පැහැර හැර ඇති මත්පැන් නිෂ්පාදන සමාගම් වෙත තමන් විශේෂ නියෝගයක් නිකුත් කර ඇති බවද ඔහු සඳහන් කළේය.

ඔහුට අනුව, මූල්‍ය දුෂ්කරතා මධ්‍යයේ වුවද වැඩි වැඩියෙන් පුරවැසියන් තම බදු ගෙවීමට ඉදිරිපත් වීම නිසා රාජ්‍ය ආදායම 2022 දී දළ දේශීය නිෂ්පාදිතයෙන් සියයට 7.3 සිට 2023 පළමු කාර්තුවේදී සියයට 15.8 දක්වා වැඩිවී ඇත.