ශ්‍රී ලංකාවේ හොඳම දක්ෂතාවන්ගෙන් එකක් ලෙස ඉතිහාසයට එක් වූ 2016 දී ඕස්ට්‍රේලියානුවන්ට එරෙහිව ලැබූ ටෙස්ට් ජය යළි සිහි කැඳවා ගනීමට මෙරට ප්‍රේක්‍ෂකයන්ට නැවත අවස්ථාව ලැබෙනු ඇති බවට බලාපොරොත්තු දැල්වෙන්නේ කණ්ඩායම් දෙක ගාල්ලේදී තරග වැදීමට නියමිත පසුබිමකය.

පළමු කණ්ඩායමේ නිත්‍ය නායක පැට් කමින්ස් නොමැති බැවින් ස්ටීවන් ස්මිත්ගේ නායකත්වයෙන් ඔවුන් තරග වදිනු ඇත.

2016 දී පැවති පළමු ටෙස්ට් තරගයේ පළමු ඉනිමේදී ලකුණු 117කට දැවී ගිය ශ්‍රී ලංකාව කුසල් මෙන්ඩිස්ගේ ලකුණු 176ක සුවිශේෂී ඉනිමක් හේතුවෙන් අමතක නොවන ජයග්‍රහණයක් වාර්තා කළේය.

මෙන්ඩිස් සහ වත්මන් නායක ධනංජය ද සිල්වා 2016 දී පිත්තෙන් දස්කම් දැක්වූ අතර පන්දුවෙන් ඕස්ට්‍රේලියානුවන්ට හානිය සිදු කළේ ශ්‍රී ලංකාවේ වඩාත්ම සාර්ථක වමත් දඟ පන්දු යවන්නා වූ රංගන හේරත් විසිනි.

දැන් ඔහුගේ භූමිකාව ඉටු කරනු ලබන්නේ 2022 දී ඕස්ට්‍රේලියානුවන්ට එරෙහි මංගල තරගයේදීම කඩුලු 12ක් දවා ගනිමින් ඔහුගේ ටෙස්ට් දිවියට විශිෂ්ට ආරම්භයක් ලබා ගත් ප්‍රභාත් ජයසූරිය විසිනි.

ස්ටීවන් ස්මිත් සහ මානස් ලැබුෂේන් ඕස්ට්‍රේලියානු පිතිකරණ පෙළේ කොඳු නාරටිය ලෙස සැළකේ.

නමුත් පසුගිය වසර හෝ දෙකක කාලය තුළ ට්‍රැවිස් හෙඩ් ඔවුන්ගේ තරඟ ජයග්‍රාහකයා බවට පත්විය.

ශක්තිමත් ඉන්දීය කණ්ඩායමට එරෙහිව ඔහුගේ පිතිකරණය ඉතා ආකර්ෂණීය විය.

මන්ද ඔහු සෑම විටම ආක්‍රමණශීලී පිතිකරණයෙන් ප්‍රතිවාදීන්ගෙන් තරගය උදුරා ගැනීමට උත්සාහ කරයි.

ජයසූරිය අවසන් වරට ඔවුන් මුණගැසුණු අවස්ථාවේ හෙඩ්ව වඩාත් හොඳින් මෙල්ල කිරීමට සමත්ව සිටිය ද ලබන සතියේ ගාල්ලේදී ඔවුන් නැවත හමුවන විට ජයසූරියට මුණගැසෙනු ඇත්තේ සම්පූර්ණයෙන්ම වෙනස් වූ හෙඩ් කෙනෙකු බව විචාරකයෝ පවසති.

හෙඩ් වමත් පිතිකරුවකු වීම සහ දිල්රුවන් පෙරේරා විශ්‍රාම ගොස් තිබීමත් රමේෂ් මෙන්ඩිස් පැහැදිලිවම මෙහි නොමැති නිසාත් ශ්‍රී ලංකාවට ඔවුන්ගේ පිට දඟ පන්දු යැවීමේ විකල්ප ගැන කරදර වීමට සිදුවිය හැකිය.