ගුවන් සේවිකාවක් වීමට අවශ්‍ය නම් මුහුණේ කුරුලෑ සාදා නොගෙන පැහැපත්ව සිටින ලෙස වරාය, නාවික හා ගුවන්සේවා ඇමැති නිමල් සිරිපාල ද සිල්වා මෙරට තරුණියන්ට දැනුම් දුන්නේය.

එමෙන්ම සම්මුඛ පරීක්ෂණයට යෑමට නියමිත දිනට පෙර නොව කාලාන්තරයක සිටම තමන් රූපලාවණ්‍ය පිළිබඳව සැළකිලිමත් වියයුතු බව බොහෝදෙනා නොදන්නා බවද ඇමැතිවරයා පැවසීය.

ඇමැතිවරයා මෙසේද සඳහන් කරයි.

“ලංකාවේ සියලුම තරුණියන්ට අවස්ථාවක් ලබාදෙන්න ප්‍රසිද්ධ වෙළෙඳ දැන්වීමක් දැම්මා ගුවන් සේවිකාවන් ලෙස බඳවා ගන්න. 6000 ගාණක් සම්මුඛ පරීක්ෂණයට ආවට අපි තෝරගත්තේ 196යි.

මේකට හුඟක් දක්ෂ අය ආවත් මූණෙ පොඩි පිම්පල් එකක් තිබුණ නම් එයාව රිජෙක්ට් කළා. ඒ වගේම සාරිය ඇන්දම බඩේ පොඩි පැල්ලමක් තිබුණ නම් එයාවත් රිජෙක්ට් කළා. ඉතිං අඬාගෙන එනවා ඊළඟට අපේ අමාත්‍යාංශයට. මගේ පිම්පල් එකක් තිබුණ කියලා කැළලක් තිබුණ කියලා මාව රිජෙක්ට් කළා කියලා.

ඒ නිසා ගුවන් සේවිකාවක් වෙන්න ඕන නම් පිම්පල් හදාගන්න එපා. පැහැපත්ව ඉන්න. ක්‍රීම් එකක් එහෙම ගාන්න. සම්මුඛ පරීක්ෂණයට යන වෙලාවට ඒ වගේ ඉන්න. තමන්ගේ රූපලාවණ්‍ය පිළිබඳවත් සැළකලිමත් වෙන්න. රූපලාවණ්‍ය පිළිබඳ සැළකියමත් වෙන්නේ සම්මුඛ පරීක්ෂණයට යන්න කළින් දවසේ විතරයි. නමුත් ඒක කාලාන්තරයක් තිස්සේ කරගෙන එන්න ඕන කියලා අපේ අය දන්නේ නැහැ. එහෙම දන්නවා නම් මීට වඩා ගම්බද විශාල පිරිසක් මේකට එනවා.”