උත්සව සමයේ මහජන ආරක්ෂාව තහවුරු කිරීමේ අරමුණින් පොලිසිය පුළුල් ආරක්ෂක මෙහෙයුමක් දියත් කර තිබේ.

පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී බුද්ධික මනතුංග පැවසුවේ, විශේෂ ආරක්ෂක වැඩපිළිවෙලක් ලෙස දිවයින පුරා පොලිස් නිලධාරීන් 35,000කට අධික පිරිසක් යොදවා ඇති බවයි.

මීට අමතරව සිවිල් ඇඳුමින් සැරසුණු බුද්ධි අංශ නිලධාරීන් ජනාකීර්ණ නාගරික ප්‍රදේශවල ස්ථානගත කර ඇතැයි ද ඔහු පැවැසුවේය.

කොළඹ පමණක් ආරක්ෂාව තර කිරීමට සහ ගමනාගමන හා මාර්ග තදබදය කළමනාකරණය කිරීම සඳහා රථවාහන පොලිසිය ඇතුළුව නිලධාරීන් 6,000කට ආසන්න සංඛ්‍යාවක් අනියුක්ත කර තිබේ.

මේ අතර උත්සව සමය වෙනුවෙන් පාරිභෝගික කටයුතු පිළිබඳ අධිකාරිය ද ඔවුන්ගේ පරීක්ෂා කටයුතු දැඩිකර තිබේ.

පාරිභෝගික කටයුතු පිළිබඳ අධිකාරී පනත උල්ලංඝනය කරමින් පාරිභෝගිකයන් නොමඟ යවන ලදැයි කියන වෙළෙඳුන් 36 දෙනෙකුට එරෙහිව නීතිමය පියවර ගෙන ඇති බව එම අධිකාරිය නිවේදනය කළේය.

මෙම වෙළෙඳුන් ඇඳුම් පැළඳුම්, පාවහන් සහ ඉලෙක්ට්‍රොනික උපකරණ අලෙවි කිරීම සම්බන්ධයෙන් සදාචාර විරෝධී ක්‍රියාවන්හි නිරත වූ බව ද එම අධිකාරිය පවසයි.