ත්‍රිකුණාමලය තෙල් ටැංකි සංකීර්ණයේ ටැංකි හතරක් මේ වසරේ අගෝස්තු මාසය වන විට ක්‍රියාත්මක කිරීමට ලංකා ඛනිජ තෙල් නීතිගත සංස්ථාව සැලසුම් කර ඇති බව වාර්තා වේ.

ඛනිජ තෙල් නීතිගත සංස්ථාවේ සභාපති සාලිය වික්‍රමසූරිය කියා සිටියේ සංස්ථාවට වෙන් කර ඇති ටැංකි 24න් මේ වසරේ අගෝස්තු මාසය වන විට ටැංකි 4 ක් භාවිතයට ගෙන ඒම ඉලක්කය වන බවයි.

“මෙම ගබඩාව යනු දේශීය හා අන්තර්ජාතික වශයෙන් අපට සැළකිව යුතු ආර්ථික මෙවලමක්. ඒ අතින් ත්‍රිකුණාමලය ටැංකි සංකීර්ණයේ අපට වෙන් කර ඇති ටැංකි 24 කඩිනම් ප්‍රතිසංස්කරණය හා වැඩිදියුණු කිරීම සඳහා ඛනිජ තෙල් නීතිගත සංස්ථාව ඉතා ඉහළ ප්‍රමුඛතාවයක් ලබා දෙනවා.ටැංකි හතර ක්‍රියාත්මක වූ පසු එමගින් ලංකා ඛනිජ තෙල් නීතිගත සංස්ථාවේ උපාය මාර්ගික ගබඩා ජාලයට ඝන මීටර් 40,000ක ගබඩා එකතු වනු ඇති” යනුවෙන් ඔහු අවධාරණය කළේය.

ත්‍රිකුණාමලය තෙල් ටැංකි සංකීර්ණය හෝ චයිනා බේ තෙල් ටැංකි සංකීර්ණය,ලෝකයේ සිව්වැනි විශාලතම ස්වාභාවික වරාය වන ත්‍රිකුණාමල වරායට ආසන්නයේ පිහිටා ඇති අතර එය දෙවැනි ලෝක යුද්ධ සමයේදී ඉදිකරන ලද බැවින් භූ දේශපාලනික හා ආර්ථික උනන්දුවක් ඇති ස්ථානයකි.

ටොන් මිලියන 1.2කට වැඩි ගබඩා ධාරිතාවක් සහිත ටැංකි 99ක් එහි පැවතිය ද එහි සම්පූර්ණ ධාරිතාව තවමත් සාක්ෂාත් කර ගෙන නොමැත.

ලංකා ඉන්දියන් ඔයිල් සමාගම 2002 දී ඇතිකරගත් ගිවිසුමකට අනුව දැනට ටැංකි 14ක් පමණක් භාවිත කරයි.

ඛනිජ තෙල් නීතිගත සංස්ථාවේ සභාපති සාලිය වික්‍රමසූරිය පැවසුවේ, මෙම වසර අගදී ටැංකි හතරේ මෙහෙයුම් දියත් කිරීමෙන් පසුව, ඛනිජ තෙල් නීතිගත සංස්ථාව “ඉන්පසු හැකි කෙටිම කාලය තුළ” සම්පූර්ණ ඝන මීටර් 240,000ක ධාරිතාව කරා යනු ඇති බවයි.

ඓතිහාසික වැදගත්කමකින් යුත් වෘක්ෂලතා සහ යටිතල පහසුකම් යන දෙකම උපරිම ලෙස සංරක්ෂණය කරමින් මෙම වැඩසටහන ක්‍රියාත්මක කෙරේ.

දැනටමත් ආරක්ෂක කණ්ඩායම්, ඉංජිනේරුවන්, මිනින්දෝරුවන්, වීඩියෝ ශිල්පීන් සහ උද්භිද විද්‍යා විශේෂඥයකු ලඳු කැලෑ ඉවත් කිරීමට සහ ඉඩම් පවරා ගැනීමට ප්‍රමුඛත්වය ලබා දීමට සහාය වීම සඳහා එවා ඇත.

“අපගේ අපේක්ෂාව වන්නේ යෝජිත ව්‍යාපාර ආකෘතිය මත පදනම්ව, ඛනිජ තෙල් නීතිගත සංස්ථාවේ අරමුදල්වලින් හෝ උපාය මාර්ගික කොටස් හවුල්කාරිත්වයකින් මෙම සංවර්ධනය සම්පූර්ණ කිරීමයි. මේ සඳහා, අන්තර්ජාතික වෙළෙඳපොළ උනන්දුව පරීක්ෂා කිරීම සඳහා සංස්ථාව සතු ටැංකි 24 සහ සීමාසහිත ට්‍රින්කෝ පෙට්‍රෝලියම් ටර්මිනල් වෙත වෙන් කර ඇති ටැංකි යන දෙකම ඇතුළත් කරමින්, සංස්ථාව වෙනුවෙන් උනන්දුව ප්‍රකාශ කිරීමට අමාත්‍යංශය ඉක්මනින්ම කැඳවීම් කරනු ඇත,”යනුවෙන් වික්‍රමසූරිය පැවසීය.

සීමාසහිත ට්‍රින්කෝ පෙට්‍රෝලියම් ටර්මිනල් යනු ඛනිජ තෙල් නීතිගත සංස්ථාව සහ ලංකා ඉන්දියන් ඔයිල් සමාගම අතර මෑතකාලීන හවුල් ව්‍යාපාරයකි.

එම සමාගමේ බහුතර කොටස් ඛනිජ තෙල් නීතිගත සංස්ථාව සතු වේ.

ඒ අනුව, ටැංකි 61ක් සීමාසහිත ට්‍රින්කෝ පෙට්‍රෝලියම් ටර්මිනල් වෙත බදු දී ඇති අතර, ඒවායේ සංවර්ධනයේ පළමු අදියර සඳහා ආයෝජකයකු සඳහා ප්‍රසම්පාදන ක්‍රියාවලිය ආරම්භ කිරීමට මේ මස මුලදී ඇමැති මණ්ඩලය විසින් අනුමත කරන ලදී.

වාර්තා වන පරිදි, පළමු අදියරේදී ඵලදායී ටැංකි නවයක් ප්‍රතිසංස්කරණය කිරීම, කිලෝමීටර් 1.75ක් දිග නල මාර්ගයක් එළීම සහ අත්‍යවශ්‍ය ආධාරක පහසුකම් ඉදිකිරීම කෙරෙහි අවධානය යොමු කරනු ඇත.(The Morning)