දිවයිනේ උසම කඳු මුදුන වන පිදුරුතලාගල සංචාරකයන් සඳහා යළි විවෘත කිරීමට කටයුතු කළ යුතු බව මධ්‍යම පළාත් ආණ්ඩුකාර ලලිත් යූ. ගමගේ නුවරඑළිය දිස්ත්‍රික් සම්බන්ධීකරණ කමිටු රැස්වීමේදී පවසා ඇත.

පිදුරුතලාගල කඳු මුදුන ඉහළ අධ්‍යාපනික සහ සංචාරක වටිනාකමක් ඇති ප්‍රදේශයක් බවත්, එය තවදුරටත් ජනතාවට තහනම් ප්‍රදේශයක් ලෙස පවත්වාගෙන යෑම නුසුදුසු බවත් ඔහු පෙන්වාදී ඇත.

“දෙස් විදෙස් සංචාරකයන් නුවරඑළිය සංචාරක කලාපවල සිට හිරු උදාව නැරඹීමට ප්‍රිය කරනවා. ඒ සඳහා ද අවස්ථාවක් ලබාදිය යුතුයි. ඒ සඳහා සුදුසු ක්‍රමවේදයන් යටතේ සංචාරක ආකර්ෂණය ඉහළ මට්ටමක පවතින ස්ථාන මහජනතාවට විවෘත කිරීම කාලීන අවශ්‍යතාවයක්” යැයි ආණ්ඩුකාරවරයා වැඩිදුරටත් පවසා තිබේ.