මාතර කොටවිල අධිකරණ සංකීර්ණයේ වාහන අංගනයේ නවතා තිබියදී සොරකම් කරන ලද ත්‍රිරෝද රථයක් පොලිසිය සොයමින් සිටී.

අධිකරණය වෙත දඩයක් ගෙවීමට පැමිණ සිටියදී සිය ත්‍රිරෝද රථය සොරකම් කිරීම සම්බන්ධයෙන් ත්‍රිරෝද රථයේ හිමිකරු විසින් කොටවිල පොලිසියට පැමිණිල්ලක් ගොනු කර තිබේ.

ත්‍රිරෝද රථ හිමිකරු දඩයක් ගෙවීමට මාතර මහේස්ත්‍රාත් අධිකරණයට පැමිණ තිබුණේ අප්‍රේල් 1 වැනි දිනයි.

අධිකරණයට යෑමට පෙර, ඔහු තම වාහනය පොදු වාහන නැවැත්වීමේ ස්ථානයේ නවතා එහි අධීක්ෂකවරයාගෙන් අංකයක් ලබාගෙන ඇත.

තම කාර්යය නිම කිරීමෙන් පසු, පස්වරු 2:00ට පමණ, ඔහු ආපසු පැමිණෙන විට ඔහුගේ වාහනය අතුරුදහන් වී ඇති බව දැක තිබේ.

අංගන අධීක්ෂකවරයාගෙන් විමසීමේදී, වාහනය පිළිබඳ කිසිවක් නොදන්නා බව ඔහු ප්‍රකාශ කර ඇත.

සවස් වන තුරුම වාහනය සෙව්ව ද හිමිකරුට එය සොයාගත නොහැකි වීම නිසා පසුව ඔහු කොටවිල පොලිසියට පැමිණිල්ලක් ගොනු කර තිබේ.

වාහන අංගනයේ සීසීටීවී දර්ශන පරීක්ෂා කිරීමේදී පොලිස් නිලධාරීන්ට පෙනීගොස් ඇත්තේ එම ත්‍රිරෝද රථය වෙනත් පුද්ගලයකු විසින් පදවාගෙන ගොස් ඇති බවයි.

ඒ අනුව ත්‍රිරෝද රථය සොරකම් කිරීම සම්බන්ධයෙන් විමර්ශනයක් ආරම්භ කර තිබේ.

වාහන අංගනය විශ්‍රාමික පොලිස් නිලධාරියකු විසින් කළමනාකරණය කරනු ලබන අතර, නීතිඥයන් ද තම වාහන නැවැත්වීම සඳහා එම අංගනය භාවිත කරන බව කියැවේ.

කොටවිල පොලිසිය වැඩිදුර පරීක්ෂණ පවත්වයි.