January 4, 2025
පාරිභෝගික කටයුතු අධිකාරිය විසින් ඉකුත් ඔක්තෝම්බර් මාසයේ සිට නිතිපතා කරන ලද විමර්ශනවලදී සහල් මෝල් හිමිකරුවන් සතුව සැඟවුණු තොග ඇති බව සොයාගැනීමට නොහැකි වූ බව එහි වැඩබලන අධ්‍යක්ෂ ජනරාල් තිලකරත්න බණ්ඩාර පවසයි.
වසර ගණනාවකින් පසුව ඉකුත් වසර අවසානය වන විට සහල් මිල සැළකිව යුතු ලෙස ඉහළ යෑම සිදුවිය.
“පසුගිය ඔක්තෝබර් පමණ සිට විවිධ වෙළඳ නාම සහිත සහල් සැපයුම මට මතක පරිදි අඩුවුණා” වැඩබලන අධ්‍යක්ෂ ජනරාල් තිලකරත්න බණ්ඩාර රූපවාහිනි වැඩසටහනකට එක්වෙමින් සඳහන් කළේය.
“ඊට පස්සේ අපේ ඇමැතිතුමාගේත් ජනාධිපතිතුමාගේත් අවධානය යොමුවුණේ තොග සඟවා ගැනීමේ සිද්ධියක් තිබෙනවාද යන්න පිළිබඳවයි. අපි සතිපතා වාර්තා දෙන්න පටන් ගත්තා.”
ඒ අනුව නොවැම්බර් 05 වැනිදා පමණ සිට සහල් තොග පිළිබඳ වාර්තා ලබාදුන් බවත්, මේ වනවිට සෑම සති දෙකකට වරක්ම අමාත්‍යාංශයට සහ ජනාධිපති ලේකම් කාර්යාලයට වාර්තා ලබාදෙන බවත් ඔහු පැවසුවේය.
“මෙම පිරිස් විශාල පරිමාණයේ තොග සඟවා ඇති බවක් අපට හමුවුණේ නැහැ” පාරිභෝගික කටයුතු අධිකාරියේ වැඩබලන අධ්‍යක්ෂ ජනරාල් තිලකරත්න බණ්ඩාර පැවසීය.
“විවිධ ස්ථානවල තොග සඟවා ඇති බවට වරින් වර අපට පැමිණිලි ලැබෙනවා.”
“සමහර මෝල්වලින් දිනකට සහල් කිලෝ ලක්ෂ 4ත් 5ත් අතර ප්‍රමාණයක් නිෂ්පාදනය කරනවා. ඒ නිසා ඔවුන්ට දින 20ක් හෝ මාසයක් පමණ සහල් නිෂ්පාදනය කිරීමට වී අවශ්‍යයි. ඒ හැර අනවශ්‍ය ප්‍රමාණයේ තොග තිබෙන බව අපට සොයාගැනීමට නොහැකි වුණා.” යනුවෙන් එහිදී ඔහු වැඩිදුරටත් පැවසුවේය.
පාරිභෝගික කටයුතු පිළිබඳ අධිකාරියේ නිලධාරීන් මහාපරිමාණ සහල් මෝල් පරික්ෂාවට යෙදවීම නිෂ්ඵල කටයුත්තක් බවත්, අදාළ ව්‍යාපාරිකයන් එම නිලධාරීන්ට වැටුප් ගෙවනු ඇති බවටත් විවධ පාර්ශ්ව පෙන්වාදී ඇත.
