ජනවාරි 24 වැනි දින පාර්ලිමේන්තුවේ සම්මත වීමෙන් පසුව, මතභේදයට තුඩු දී ඇති මාර්ගගත(ඔන්ලයින්) ආරක්ෂණ පනත් කෙටුම්පත නිල වශයෙන් නීතියක් ලෙස අත්සන් කිරීමට පෙර තවදුරටත් නීතිමය පරීක්ෂාවට ලක්කිරීමට නියමිත බව වාර්තා වේ.

කථානායක මහින්ද යාපා අබේවර්ධන පවසා ඇත්තේ, ව්‍යවස්ථා සම්පාදන ක්‍රියාවලියේදී ඇතුළත් කරන ලද සියලුම සංශෝධන ශ්‍රේෂ්ඨාධිකරණ නියෝගවලට අනුව නිසි පරිදි ක්‍රියාත්මක වූයේද යන්න පිළිබඳව නීතිපති දෙපාර්තමේන්තුව විමර්ශනය කරන බවයි.

නීතිමය ක්‍රියා පටිපාටිවලට අනුකූලව කටයුතු කිරීම සහතික කිරීම සහ විය හැකි යම් අඩුපාඩුකම් සපුරාලීම සඳහා “සෑම පනතක්ම” නීතිපති කාර්යාලය විසින් එවැනි පරීක්ෂාවට ලක්කරන බවට කථානායකවරයා පවසයි.

මීට අමතරව, නීතිපතිවරයාගෙන් තහවුරු කිරීම ලැබීමෙන් පසු පාර්ලිමේන්තු නිලධාරීන් කණ්ඩායමක් දෙවන සමාලෝචනයක් සිදුකරනු ඇත.

මෙම ක්‍රියාවලිය සපුරාලීමෙන් පසුව කථානායකවරයා පනත් කෙටුම්පතට අත්සන් කර අවසන් කරනු ලබයි.

මෙම ආන්දෝලනාත්මක පනත් කෙටුම්පත පාර්ලිමේන්තුව හරහා සම්මත කර ගැනීම දැඩි විවාදාත්මක කටයුත්තක් විය.

පනත් කෙටුම්පත දෙවැනි වර කියවීම වැඩි ඡන්ද 46 කින් සම්මත විය. පනත් කෙටුම්පතට පක්ෂව ඡන්ද 108ක් ලැබුණු අතර විපක්ෂව ඡන්ද 62ක් ලැබිණි.

අනතුරුව පනත් කෙටුම්පතේ තුන්වැනි වර කියවීම ඡන්ද විමසීමකින් තොරව සම්මත විය.

ඔන්ලයින් ආරක්ෂණ පනත් කෙටුම්පත ශ්‍රී ලංකාවේ සමාජ මාධ්‍ය අන්තර්ගතයන් නියාමනය කිරීම අරමුණු කරයි.

එහෙත් විචාරකයන් අනතුරු අඟවන්නේ, එය වාරණයට සහ නිදහසේ කතාකිරීම මර්දනය කිරීමට හේතු විය හැකි බවයි.