උප්පැන්න, විවාහ,මරණ සහතික ඔන්ලයින් ක්‍රමයට සහතික කර ගැනීම සඳහා විදේශ කටයුතු අමාත්‍යාංශයේ කොන්සියුලර් අංශය කටයුතු යොදා තිබේ.

ඒ සඳහා වන ඔන්ලයින් ද්වාරය ඊයේ දියත් කෙරිණි.

විදේශ ඇමැති අලි සබ්රි ‘X’ සමාජ මාධ්‍ය වේදිකාවේ සටහනක් තබමින් සඳහන් කළේ මීට වසර දෙකකට පෙර, අමාත්‍යාංශය භාර ගන්නා විට, මෙම සේවාවන් සඳහා ඇති ඉල්ලුම හේතුවෙන් විශාල ජනකායක් පැමිණි අතර එක රැයකින් පෝලිම් ද ඇති වූ බවයි.

මෙම ගැටලුව විසඳීම සඳහා මූලික පියවරක් ලෙස විදේශ අමාත්‍යාංශය විසින් eChanneling ද්වාරය හරහා අන්තර්ජාලය ඔස්සේ හමුවීම් හඳුන්වා දී ඇති අතර එමඟින් මහජන අපහසුතා සැළකිව යුතු ලෙස අඩු කරන ලදී.

“අපගේ ගමන ආරම්භ වූයේ විභාග දෙපාර්තමේන්තුවේ ලේඛන සහතික කිරීමත් සමඟයි. එය සුවිශේෂී සන්ධිස්ථානයක්. පසුව අපි රෙජිස්ට්‍රාර් ජනරාල් දෙපාර්තමේන්තුවේ ලේඛන ඇතුළත් කිරීම දක්වා වැඩපිළිවෙළ පුළුල් කළා,” යනුවෙන් ඔහු සඳහන් කරයි.

ඇමැති අලි සබ්රි පෙන්වා දුන්නේ දැනට 50-55% ලේඛන සඳහා අමාත්‍යාංශයට මාර්ගගත සහතිකය සම්පූර්ණ කළ හැකි බවයි.

ඉදිරියේ දී සියලුම ලේඛන අන්තර්ජාලය හරහා සහතික කිරීමේ හැකියාව ලබා ගැනීමට කටයුතු කරමින් සිටින බව ද ඔහු සඳහන් කරයි.