ඕස්ට්‍රේලියාවේ සිඩ්නි මින්මැදුරක වාසය කළ ‘ස්පෙන් ‘ නැමති පෙන්ගුයින් මියයෑමත් සමග ලොව ප්‍රසිද්ධියට පත්ව තිබූ සමලිංගික පෙන්ගුයින් ආදර කතාව නිමා වී තිබේ.

ස්පෙන් තම සහකරු වන මැජික් සමග වසර හයක් එකට ජීවත්වෙමින් ලාරා සහ ක්ලැන්සි නම් පැටවුන් දෙදෙනෙකුද ඇති දැඩි කිරීමට දායක වී තිබිණි.

ජෙන්ටෝ පෙන්ගුයින් වර්ගයට අයත් ස්පෙන් සහ මැජික් සැළකෙන්නේ සමලිංගික අයිතිවාසිකම් ව්‍යාපාරයේ සංකේතයක් ලෙසයි.

වයස අවුරුදු 11ක් වූ ස්පෙන් මිය යෑමත් සමග මේ වසරේ වයස අවුරුදු 9 පිරෙන මැජික් වෙත මින්මැදුරේ සේවකයන් වැඩි අවධානයක් යොමු කිරීමට කටයුතු කර තිබේ.

ස්පෙන්ගේ මරණයෙන් පසු ඔහුගේ ආත්මීය සහකාරිය බැලීමට මැජික් රැගෙන ගිය අතර, ස්පෙන් නැවත නිවසට නොපැමිණෙන බව මැජික්ට තේරුම් ගැන්වීම එහි අරමුණයි.

ස්පෙන් දුටු විට මැජික් ගායනා කිරීමට පටන් ගත් බවත් පසුව එය පෙන්ගුයින් ජනපදයේ ප්‍රතිරාව දුන් බවත් විදෙස් මාධ්‍ය වාර්තා කරයි.

ස්පෙන් අසනීප වීම හේතුවෙන් දිගු කාලයක් දුක් විඳීමෙන් පසු ස්පෙන්ට දයානුකම්පිත මරණයක් අත්කර දීමට මින් මැදුරේ බලධාරීන්ට සිදු විය.

2018 දී සී ලයිෆ් සිඩ්නි මින්මැදුරේ කාර්ය මණ්ඩලය විසින් ස්පෙන් සහ මැජික් පෙන්ගුයින් දෙදෙනා වෙන් කළ නොහැකි බව සොයා ගැනීමත් සමඟ එය ලොව පුරා ප්‍රසිද්ධියට පත් විය.

සංසර්ග කාලයට පෙර ඔවුන් දෙදෙනා එකට ඉබාගාතේ ඇවිදිමින් සිටින බවත් ඔවුන් එක්ව තමන්ගේම කූඩුවක් නිර්මාණය කිරීම සඳහා ගල් කැට එකතු කිරීමට පටන් ගත් විට සැකය සනාථ වීමත් සමග ඔවුන්ගේ ආදරය ලොවට හෙළි කෙරිණි.

මින් මැදුරේ භාරකරුවන් විසින් යුවළට පළමුව ව්‍යාජ බිත්තරයක් ලබා දෙන ලදී.

ඔවුන් ස්වාභාවික ලෙස හැසිරීම නිසා අවසානයේදී ඔවුන්ට සැබෑ බිත්තරයක් ලබා දී ඇත.

ඒ අනුව 2018 ඔක්තෝබරයේ දී එවක ස්පෙන්ජික් ලෙස නම්කෙරුණු පෙන්ගුයින් පැටවා බබා උපත ලැබීය.

පසුව එම පැටවාට ලාරා ලෙස නම් තබා තිබේ.

සී ලයිෆ් සිඩ්නි මින්මැදුරේ සාමාන්‍යාධිකාරී Richard Dilly පැවසුවේ ස්පෙන් අහිමි වීම පෙන්ගුයින් ජනපදයට, කණ්ඩායමට සහ ස්පෙන් සහ මැජික් ආදර කතාවෙන් ආස්වාදයක් ලැබූ සෑම කෙනෙකුටම හද කම්පා කරවන සුළු දෙයක් බවයි.