පසුගිය වසරට සාපේක්ෂව මේ වසරේ බදු ගෙවීමට අවශ්‍ය පුද්ගලයන් සංඛ්‍යාව සියයට 160 කින් ඉහළ ගොස් ඇති බව දේශීය ආදායම් දෙපාර්තමේන්තුව නිවේදනය කරයි.

2023/2024 වරිපනම් වර්ෂය සඳහා බදු ගෙවන්නන් සංඛ්‍යාවෙහි සැළකිවයුතු වර්ධනයක් දේශීය ආදායම් දෙපාර්තමේන්තුව විසින් වාර්තා කර ඇත.

මෙම වසරේදී පුද්ගලයන් 868,009 දෙනකු ආදායම් වාර්තා ඉදිරිපත් කිරීමට අවශ්‍ය වන අතර එය පෙර වසරේ පැවති 333,313 ට වඩා තියුණු වැඩිවීමකි.

බදු ගෙවන්නන්ගේ වර්ධනයට හේතු වී ඇත්තේ දේශීය ආදායම් පනතේ මෑත කාලීන සංශෝධන, ව්‍යාපාරිකයන්, වෘත්තිකයන් සහ වත්කම් හිමියන් ඉලක්ක කර ගනිමින් ලියාපදිංචි කිරීමේ උත්සාහයන් පුළුල් කිරීමෙනි.

බොහෝ නව ලියාපදිංචි කිරීම් බදු ගෙවන්නන් හඳුනාගැනීමේ අංක (TIN) සමඟ සම්බන්ධ වී ඇති බව දේශීය ආදායම් දෙපාර්තමේන්තුව සඳහන් කරයි.

මේ අතර මසකට රු. 100,000 කට වැඩි හෝ වසරකට රු. මිලියන 1.2 කට වැඩි ආදායම් ලබන පුද්ගලයන් සිය ආදායම් ප්‍රකාශ අන්තර්ජාලය හරහා ඉදිරිපත් කළ යුතුය.

එසේ කළ නොහැකි අය සඳහා දේශීය ආදායම් දෙපාර්තමේන්තුවේ ප්‍රධාන කාර්යාලයෙන් සහ පළාත් කාර්යාලවලින් සහාය ලබාගත හැකිය.